Ուկրաինական ուժերը հերթական անգամ թիրախավորել են Մոսկվան՝ հայտնել են Ռուսաստանի պաշտպանության նախարարությունից:
Գերատեսչության տվյալով՝ անօդաչուներ են արձակվել նաև Սևաստոպոլի ուղղությամբ: Ռուսական կողմն ընդհանուր առմամբ 13 անօդաչու թռչող սարք է խոցել:
«Ահաբեկչական հարձակումների հետևանքով զոհեր և ավերածություններ չկան»,- ասված է հաղորդագրության մեջ։
Երեկ Մոսկվայի քաղաքապետը հայտնել էր, որ ռուսական կողմը դեպի Մոսկվա արձակված երկու մարտական ԱԹՍ է խոցել:
Ռուսական կողմը հարվածել է Զապորոժիեի բնակելի թաղամասին, կան զոհեր և վիրավորներ, այդ թվում՝ երեխաներ: Այդ մասին հայտնել են տեղական իշխանությունները՝ կատարվածը որակելով ահաբեկչություն:
Նշվում է, որ ռուսական ուժերը 1 օրվա ընթացքում 82 հարված են հասցրել Զապորոժիեի շրջանի 21 բնակավայրի։
Ուկրաինական կողմը հայտնել է, որ զանգվածային հարձակման է ենթարկվել նաև Դուբնոյի շրջանը, ինչի հետևանքով նավթի պահեստ է ոչնչացվել: Զոհերի մասին տեղեկություններ չկան:
Վաղ առավոտյան օդային տագնապ է հայտարարվել Ուկրաինայի բոլոր շրջաններում։