Երեկ՝ նոյեմբերի 8-ին, բացահայտվել է առանձնապես ծանր հանցագործություն, որի ժամանակ հնչել են կրակոցներ, եղել է վիրավոր:
Ինչպես հայտնում է shamshyan.com-ը, ոստիկանության Արմավիրի մարզային վարչությունում տեղեկություններ են ստացվել, որ նոյեմբերի 5-ին՝ ժամը 16:00-ի սահմաններում, Ապագա գյուղի հարակից տարածքում «Ֆորդ» մակնիշի ավտոմեքենայի վարորդ, Արմավիրի մարզի բնակիչ 29-ամյա Զավեն Մ.-ն, նրա ուղևոր, Արմավիրի մարզի բնակիչ 29-ամյա Գևորգ Մ.-ն «մի կաթիլ մեղրի» պատմություն հիշեցնող՝ ճանապարհը չզիջելու հարցի շուրջ վիճաբանել են Արարատի մարզի բնակիչ 52-ամյա Խոդեդա Ֆ.-ի հետ: Վերջինս եղել է «Մերսեդես» մակնիշի ավտոմեքենայով:
Վիճաբանության ժամանակ փոխադարձ հնչեցրել են հայհոյանքներ, և միմյանց միջև տեղի է ունեցել քաշքշոց:
Ոստիկանները օպերատիվ տվյալներով պարզել են, որ այդ ամենին ներկա են եղել «Մերսեդես»-ի ուղևորներ Խոդեդա Ֆ.-ի՝ Արարատի մարզի բնակիչ 55-ամյա կինը և կնոջ քույրը:
Վիճաբանություն-քաշքշոցից հետո նշված անձինք հեռացել են, ու Խոդեդա Ֆ.-ն կատարվածի մասին պատմել է իր որդիներ, Արմավիրի մարզի բնակիչներ 32-ամյա Ռուստամ Ֆ.-ին, 29-ամյա Քյարամ Ֆ.-ին, ովքեր նախապես պայմանավորվել են և նոյեմբերի 6-ին՝ ժամը 19:00-ի սահմաններում, եկել են Արմավիրի մարզի Ջրառատ գյուղի վարչական տարածք, որտեղ կամրջի հարևանությամբ հանդիպել են Զավեն Մ.-ին, Գևորգ Մ.-ին, Արմավիրի մարզի բնակիչ 28-ամյա Դավիթ Հ.-ին և վերջինիս ընկերների հետ:
Սկսվել է վիճաբանություն, որի ժամանակ Քյարամ Ֆ.-ն իր մոտ եղած ինքնաձիքով կրակահերթ է արձակել Դավիթ Հ.-ի կողմից վարվող «Օպել» մակնիշի ավտոմեքենայի և հավաքված մարդկանց ուղղությամբ:
Կայքի տեղեկություններով՝ կրակոցների հետևանքով Դավիթ Հ.-ն ստացել է հրազենային վնասվածք ոտքի հատվածում, իսկ մյուսները դիմել են փախուստի:
Ոստիկանության աշխատանքների արդյունքում Ապագա գյուղում՝ ժողովրդին հայտնի «Նասոսնի» կոչվող հատվածում, հայտնաբերել են Դավիթ Հ.-ի կողմից վարած «Օպել» մակնիշի ավտոմեքենան, որի վրա առկա են բազմաթիվ կրակոցի հետքեր:
Դեպքի փաստով Վաղարշապատի քննչական բաժնում նախաձեռնվել է քրեական վարույթ:
Ավտոմեքենան տեղափոխվել է ոստիկանության Վաղարշապատի բաժնի պահպանվող հատուկ տարածք: