Սահմանադրական դատարանում այսօր՝ արդեն 5-րդ օրն անընդմեջ շարունակվում է հունիսի 20-ի արտահերթ խորհրդարանական ընտրությունների արդյունքների վիճարկման գործով նիստը:
Սահմանադրական դատարանի նախագահ Արման Դիլանյանը րոպեներ առաջ խնդրեց հասարակության եւ Զանգվածային լրատվամիջոցների ներկայացուցիչներին՝ լքել նիստերի դահլիճը: Որոշվեց փակ ռեժիմով քննարկել հարցով զեկուցող Էդգար Շաթիրյանի առաջարկը՝ նիստը դռնփակ շարունակելու մասին:
Փակ նիստին մասնակցում են դատավորներն ու կողմերի ներկայացուցիչները:
«Սահմանադրական դատարանի մասին օրենքի 35-րդ հոդվածը կարգավորում է դատարանում գործի քննության հրապարակայնության հետ կապված հարցերը: Նույն հոդվածի 4-րդ մասի համաձայն՝ դատավարության մասնակիցների անձնական կյանքի, անչափահասների կամ արդարադատության շահերի, ինչպես նաեւ պետական անվտանգության, հասարակական կարգի կամ բարոյականության պաշտպանության նպատակով ԶԼՄ-ների եւ հասարակության ներկայացուցիչների մասնակցությունը դատական նիստին կարող է արգելվել՝ դատավորների ընդհանուր թվի ձայների մեծամասնությամբ ընդունված աշխատակարգային որոշմամբ»,- դռնփակ ռեժիմի անցնելուց առաջ ընթերցեց Դիլանյանը՝ չմանրամասնելով, թե օրենքում թվարկված դեպքերից որին է առնչվելու քննարկվելիք հարցը:
Հիշեցնենք, ընտրությունների արդյունքները բողոքարկում են «Հայաստան», «Պատիվ ունեմ» դաշինքները, «Զարթոնք» եւ «Հայոց Հայրենիք» կուսակցությունները: Պատասխանող կողմն է ԿԸՀ-ն: