Ազգային ժողովի արտաքին հարաբերությունների մշտական հանձնաժողովի նախագահ Սարգիս Խանդանյանի կարծում է, որ խորհրդարանը պետք է վավերացնի Միջազգային քրեական դատարանի Հռոմի կանոնադրությունը (Հռոմի ստատուտ)։
Խանդանյանն այս մասին ասաց ԱԺ-ում լրագրողների հետ ճեպազրույցում։
«Ինչպես գիտեք, Հռոմի ստատուտը արդեն խորհրդարանում է, և կան ժամկետներ, որոնց ընթացքում կունենանք քննարկումներ խմբակցության մակարդակում, նաև ԱԺ-ի համապատասխան հանձնաժողովում հարցը պետք է քննարկվի։ Այս պահին խորհրդարան ուղարկված տարբերակում չկան վերապահումներ։ Ես կարծում եմ, որ, այո, պետք է այն վավերացվի»,- ասաց Խանդանյանը։
Ինչ վերաբերում է լրագրողի այն հարցին, թե Ռուսաստանն այս թեմայի առնչությամբ անհանգստություն է հայտնել և պարզաբանումներ է պահանջել հայկական կողմից, ԱԺ հանձնաժողովի նախագահն ասաց.
«Ես չգիտեմ, թե ինչ բովանդակությամբ հարցեր են առաջադրել Հայաստանին և չգիտեմ՝ արդյոք պատասխաններ կա՞ն դրանց, թե՞ ոչ: Այնուամենայնիվ, ես կրկնում եմ, որ նման փաստաթղթերին միանալը Հայաստանի սուվերեն իրավունքն է, և առանձնապես բացատրությունների կարիք չկա: Եթե ընթերցեք ստատուտը, կտեսնեք մի շարք ռազմական հանցագործություններին անդրադարձ, որոնք տեղի են ունենում վերջին երկու տարիներին Հայաստանի տարածքում Ադրբեջանի ագրեսիաների ընթացքում: Բացի այդ, ստատուտն անդրադառնում է ցեղասպանությանը՝ որպես քրեորեն պատժելի երևույթի, և կարծում եմ, որ Հայաստանը՝ որպես ցեղասպանության ժառանգների երկիր, նաեւ բարոյապես է պարտավոր միանալ այս մեխանիզմին»։
Ավելի վաղ, Սահմանադրական դատարանը ճանաչել էր սահմանադրությանը համապատասխանող 1998 թվականի հուլիսի 17-ին ստորագրված՝ Միջազգային քրեական դատարանի Հռոմի կանոնադրությունում ամրագրված պարտավորությունները։ 2022 թվականին այս հարցով Սահմանադրական դատարան է դիմել Կառավարությունը։ Ավելի ուշ, գործադիր մարմինը Միջազգային քրեական դատարանի Հռոմի կանոնադրությունը (Հռոմի ստատուտ) ուղարկել էր Ազգային ժողով՝ վավերացման:
Կառավարությունը կրկին վերադարձել է Հռոմի կանոնադրության ճանաչման հարցին, քանի որ, ըստ այս նախագծի հիմնավորման, հնարավորություն են տեսնում Ադրբեջանին պատասխանատվության կանչելու: