ՌԴ Բելգորոդի մարզի Վալույկի քաղաքի գնդակոծության հետևանքով 8 մարդ է վիրավորվել: Վիրավորների թվում կա նաև մեկ երեխա, որին անրակի կոտրվածքով կտեղափոխեն Բելգորոդի հիվանդանոց: Ինչպես տեղեկանում ենք «РИА Новости» գործակալությունից, այս մասին հայտնել է Բելգորոդի մարզի առողջապահության նախարարը:
Իսկ Բելգորոդի նահանգապետ Վյաչեսլավ Գլադկովը հայտնել է, որ վերջին մեկ օրվա ընթացքում Բելգորոդի ուղղությամբ արձակվել է 40 հրետանային արկ և 14 «Գրադ»-ի արկ: Հրետակոծության հետևանքով մի քանի բազմաբնակարան շենքերում փշրվել են ապակիները, վնասվել են շենքերի ճակատները:
Ուկրաինական կողմն էլ հաղորդել է, որ ռուսական ուժերը Օդեսայի մարզի վրա են արձակել չորս «Կալիբր» թևավոր հրթիռ, որոնք բոլորը խոցվել են:
Ուկրաինայի պաշտպանության փոխնախարար Աննա Մալյարն էլ հայտնել է, որ երկու շաբաթ շարունակվող հակահարձակման ընթացքում Բերդյանսկի և Մելիտոպոլի ուղղություններում ազատագրվել է 8 բնակավայր: Դրանցից վերջինը մասամբ ՌԴ-ի վերահսկողության տակ անցած Զապորոժիեի մարզի Պյատիխատկի բնակավայրն է: Ըստ BBC-ի ռուսական ծառայության՝ գյուղի կորուստն ընդունել է նաև Զապորոժիեի՝ ՌԴ-ի կողմից նշանակված ղեկավար Վլադիմիր Ռոգովը: Իսկ ՌԴ ՊՆ-ն այսօրվա տեղեկագրում հայտնել է մի շարք բնակավայրերի, այդ թվում՝ Պյատիխատկիի շրջանում ուկրաինական անօդաչուների ոչնչացման մասին: