«Վագներ» մասնավոր ռազմականացված ընկերության հիմնադիր Եվգենի Պրիգոժինը հայտարարել է Ռոստովի ռազմական օբյեկտների նկատմամբ վերահսկողության հաստատման մասին. նա հերթական տեսանյութն է հրապարակել, այս անգամ` Դոնի Ռոստով տեղակայված Հարավային ռազմական շրջանի շտաբից:
«Մենք շտաբում ենք. առավոտյան 7:30 է: Մեր վերահսկողության տակ են Ռոստովի ռազմական օբյեկտները, այդ թվում` օդանավակայանը: Ռազմական առաքելություն իրականացնող ինքնաթիռներն առանց խնդիրների հեռանում են, նույնը սանիտարականների դեպքում է: Մենք ընդամենը վերահսկում ենք, որպեսզի գրոհային ինքնաթիռները հարվածներ հասցնեն ոչ թե մեր, այլ ուկրաինացիների ուղղությամբ»,- հայտարարել է նա` հավելելով, որ գլխավոր շտաբը, հրամանատարական կետը աշխատում է իր սովորական ռեժիմով, որևէ մեկի աշխատանքը չի դադարեցվել:
Ռոստովի ռազմական շտաբում ՌԴ պաշտպանության փոխնախարար Եվկուրովի ու ԳՇ պետի տեղակալ Ալեկսեևի հետ զրուցելիս Պրիգոժինը պահանջել է Շոյգուին ու Գերասիմովին: Հակառակ պարագայում նա խոստացել է շարժվել Մոսկվա։
ՌԴ նախագահ Վլադիմիր Պուտինը հանդես կգա ուղերձով: Այս մասին հայտնել է ՌԴ նախագահի խոսնակ Դմիտրի Պեսկովը:
Պուտինն ուղերձով հանդես կգա Երևանի ժամանակով 11:00-ին:
Մոսկվայի քաղաքապետ Սերգեյ Սոբյանինը հայտնել է, որ մայրաքաղաքում անցկացվում են անվտանգության ուժեղացման գծով հակաահաբեկչական համալիր միջոցառումներ: Ճանապարհներին վերահսկողությունը կուժեղացվի, հնարավոր է` զանգվածային միջոցառումները չեղարկվեն:
Մերձմոսկվայի նահանգապետ Անդրեյ Վորոբյովը քաղաքացիներին կոչ է արել խուսափել շրջանի հարավային ուղղությամբ երթևեկելուց: Հակաահաբեկչական միջոցառումներն ուժեղացվել են` ասել է նա` հավելելով, որ իրավիճակն ամբողջությամբ վերահսկվում է իրավապահների, այդ թվում` Անվտանգության դաշնային ծառայության կողմից:
Ռոստովի շրջանի նահանգապետ Վասիլի Գոլուբևը հայտարարել է, որ հունիսի 24-ին նախատեսված բոլոր զանգվածային միջոցառումները չեղարկվել են, Ռոստովում որոշակի սահմանափակումներ են մտցվել տրանսպորտային միջոցների տեղաշարժման համար` Տագանրոգի և հյուսիսային ուղղություններով:
Ռուսաստանի պաշտպանության նախարարությունը հանդես է եկել «Վագներ» մասնավոր ռազմական ընկերության մարտիկներին ուղղված կոչով:
«Ձեզ խաբելով ներգրավել են Պրիգոժինի հանցավոր արկածախնդրության և զինված ապստամբության մասնակցության մեջ: Մի քանի ջոկատներից ձեր ընկերներից շատերն արդեն գիտակցել են իրենց սխալը՝ օգնություն խնդրելով՝ ապահովելու նրանց վերադարձը մշտական տեղակայման կետեր: Օգնության դիմած բոլոր մարտիկներին և հրամանատարներին մենք արդեն աջակցություն ենք ցուցաբերել»,- նշված է ՌԴ ՊՆ հայտարարության մեջ։
Գերատեսչությունից խոստացել են երաշխավորել բոլորի անվտանգությունը՝ պաշտպանության նախարարության կամ իրավապահ մարմինների հետ հնարավորինս շուտ կապ հաստատելու դեպքում:
Մոսկվա քաղաքում, Մոսկվայի, Վորոնեժի մարզերում հակաահաբեկչական գործողության ռեժիմ է սահմանվել: Մոսկվայի քաղաքապետ Սերգեյ Սոբյանինը հայտարարել է, որ մայրաքաղաքի բոլոր զանգվածային միջոցսառումները չեղարկվել են:
Միջոցառումները չեղարկվել են նաև Լիպեցկի, Վորոնեժի, Ռոստովի և այլ մարզերում:
Փակ են Ռուսաստանի հարավի մի շարք միջմարզային և միջքաղաքային ավտոճանապարհներ:
Լրատվամիջոցները հայտնում են, որ ուժայինները շրջափակել են Սանկտ Պետերբուրգում «Վագներ»-ի կենտրոնի շենքը: Խիստ հսկողություն է սահմանվել Կրասնոդարի, Ստավրոպոլի և այլ մարզերի պետական նշանակության շենքերում:
