Նախնական տեղեկություններով՝ քիչ առաջ պայթյուն է տեղի ունեցել Երևանի պետական համալսարանի քիմիայի ֆակուլտետի մասնաշենքում։ Պայթյունի ձայնը լսվել է շատ հեռվից։ Ըստ տեղեկությունների՝ կան զոհ և վիրավորներ:
Նախնական տվյալների համաձայն՝ երեք տուժաժ հոսպիտալացվել է: Ցուցաբերվում է անհրաժեշտ բժշկական օգնություն, այս պահին անցնում են հետազոտություն:
3 տուժածներից մեկի առողջական վիճակը գնահատվում է ծայրահեղ ծանր, գտնվում է վերակենդանացման բաժանմունքում: Այս մասին տեղեկացնում են ՀՀ առողջապահության նախարարությունից: Մյուս տուժածի առողջական վիճակը միջին ծանրության է, երրորդինը` բավարար:
Պայթյունի ձայնը լսվել է շատ հեռվից։ Նախնական վարկածով՝ հրդեհը բռնկվել է հոսանքի տատանումների պատճառով։
Նկուղային հարկում հանդերձարան է եղել՝ նախատեսված կանաչապատման աշխատակիցների արտահագուստը փոխելու և գործիքները պահելու համար: Այս մասին ասել է ԵՊՀ քիմիայի ֆակուլտետի դեկան Տարիել Ղոչիկյանը:
3 վիրավորներից մեկը եղել է ոստիկանության աշխատակից, զոհը եղել է կանաչապատման բաժնի աշխատակիցը: Այս մասին լրագրողների հետ զրույցում ասել է ԵՊՀ ռեկտորի խորհրդական Վիգեն Խալաթյանը:
ԵՊՀ մամուլի խոսնակ Քնար Միսակյանը ԵՊՀ-ում տեղի ունեցած պայթյունի մասին գրառում է արել իր Ֆեյսբուքի էջում.
«Հարգելի՛ գործընկերներ, այժմ հրդեհը մարված է, իրականացվում են համապատասխան գործողություններ»։