Ապրիլի 9-ին Ֆրանսիայում Հայաստանի դեսպանությունը մասնակցել է փարիզամերձ Կուրբըվուա (Courbevoie) քաղաքում Հայոց ցեղասպանության 107-րդ տարելիցին նվիրված հիշատակի միջոցառմանը, որը կազմակերպել էր Կուրբըվուայի քաղաքային խորհուրդը` Ֆրանսիայի համար մարտնչած զինվորների ասոցիացիայի հետ համատեղ:
Կուրբըվուա քաղաքի Հիշատակի կոթողի առջև Հայոց ցեղասպանության զոհերի հիշատակը հարգել են և ծաղկեպսակներ խոնարհել Կուրբըվուայի փոխքաղաքապետ Բենեդիկտ Ժորժը, Օ-դը-Սեն դեպարտամենտի սենատոր Էրվե Մարսեյը, պատգամավոր Քրիստին Էնիոնը, Օ-դը-Սեն դեպարտամենտի փոխնախագահ Մարի-Պիեռ Լիմոժը, Ֆրանսիայում Հայաստանի դեսպանության երկրորդ քարտուղար Սուսաննա Ադամյանը, Փարիզի 8-րդ թաղամասի քաղաքապետ Ժանն դը Օթսերը, Իլ-դը-Ֆրանսի շրջանային խորհրդի անդամները, Կուրբըվուայի քաղաքային խորհրդի անդամները:
Զինվորական կարգով կազմակերպված Հայոց ցեղասպանության 107-րդ տարելիցի ոգեկոչման միջոցառմանը ներկա են եղել նաև ֆրանսահայ համայնքի ներկայացուցիչները, տեղի բնակիչները:
Հիշեցնենք, որ ապրիլի 10-ին Ֆրանսիայում տեղի ունեցավ նախագահական ընտրությունների առաջին փուլը: Նախնական տվյալներով` մասնակցությունը եղել է շուրջ 75 տոկոս: Երկրի առաջնորդի պաշտոնի համար պայքարին մասնակցում էին 12 թեկնածուներ: Ընտրությունների երկրորդ փուլը կկայանա ապրիլի 24-ին: Առաջին փուլի նախնական տվյալների հրապարակումից հետո անցկացված հարցումների համաձայն առաջատարը գործող նախագահ Էմանուել Մակրոնն է: Վերջինս ստացել է ձայների 27,41 տոկոսը: Ընտրապայքարի մասնակիցներից «Ազգային միավորում» կուսակցության առաջնորդ Մարին Լը Պենը ստացել է ձայների 24,03 տոկոսը:
