Արարատի մարզի Սուրենավան գյուղում տեղի ունեցած վթարի հետևանքով տուժած 14-ամյա տղայի վիճակը գնահատվում է ծայրահեղ ծանր: Երեխան Սուրենավան գյուղից տեղափոխվել է Երևանի «Սուրբ Աստվածամայր» ԲԿ, գտնվում է վերակենդանացման բաժանմունքում:
Բժշկական կենտրոնի մամուլի խոսնակ Գևորգ Դերձյանը ՀԺ-ի հետ զրույցում մանրամասնեց՝ «երեխան գտնվում է անգիտակից վիճակում, ինքնուրույն շնչել չի կարողանում: Միացված է արհեստական շնչառության սարքին, վիճակը գնահատվում է ծայրահեղ ծանր»:
14-ամյա պատանին ունի նաև զուգակցված վնասվածքներ, դիմային ոսկորների կոտրվածքներ, գլխուղեղի սալջարդ, ողերի կոտրվածքներ, կոնքի ոսկրերի կոտրվածներ, որովայնի սալջարդ: Վիրահատվել է, կատարվել է անհրաժեշտ բժշկական բոլոր միջամտությունները:
Ըստ Գևորգ Դերձյանի՝ երեխան գտնվում է բժիշկների հսկողության տակ, նախօրեին նրան տեսակցել է ՀՀ առողջապահության նախարարի տեղակալ Գևորգ Սիմոնյանը:
Ըստ ոստիկանության հաղորդագրության՝ հունիսի 16-ին ժամը 15:50-ի սահմաններում, Արարատի մարզի Սուրենավան գյուղում իրար են բախվել «ՎԱԶ-2121» և «Տոյոտա Լանդ Քրուիզեր» մակնիշի ավտոմեքենաներ: Պատահարի հետևանքով «ՎԱԶ-2121» մակնիշի ավտոմեքենայում գտնված 14-ամյա պատանին, ինչպես և «Տոյոտա Լանդ Քրուիզեր» մակնիշի ավտոմեքենայում գտնված 23 և 24-ամյա անձինք տեղափոխվել են տարբեր բժշկական կենտրոններ։
Մամուլում տարածված տեղեկությունների համաձայն՝ վթարը եղել է ՀՀ տարածքային կառավարման և ենթակառուցվածքների նախարարի պաշտոնակատար Սուրեն Պապիկյանին սպասարկող մեքենայի մասնակցությամբ: Երեխան, որը գտնվել է «ՎԱԶ-2121» մեքենայի ղեկին բախվել է «Տոյոտա Լանդ Քրուիզեր»-ին:
Անդրադառնալով այս տեղեկություններին՝ Սուրենավանի գյուղապետ Կարո Կարապետյանը ՀԺ-ի հետ զրույցում ասաց՝ հանուն արդարության ու իրականության պետք է նշի, որ Պապիկյանը ոչ մեքենայի ղեկին է եղել, ոչ գտնվել է մեքենայում. «Իրենք իմ աչքի լույսը չեն, բայց արդարություն ու իրականություն կա՝ միայն վարորդն էր մեքենայում: Վարորդն էլ էր վնասվածք ստացել, ոտքը կոտրված վիճակում 14 տարեկան երեխային էր օգնություն ցույց տալիս: Ես Արարատի մարզում Պապիկյանին չընդունող գյուղապետերից եմ, բայց ճիշտը մնում է ճիշտ, Պապիկյանը մեքենայում չէր: Վթարից 3 րոպե հետո եմ ես էնտեղ եղել: Չեմ կարող ասել՝ ով է մեղավորը, բայց դե ղեկին երեխա ու 14 տարեկան: Մնացածը քննությունը կպարզի»:
