Հայաստանի, Ադրբեջանի և Թուրքիայի միջև հարաբերությունների ամբողջական կարգավորումը նոր հնարավորություններ կստեղծի կովկասյան տարածաշրջանի համար:

Այս մասին ասել է Թուրքիայի պաշտպանության նախարարը TRT World-ի համար հոդվածում:

Նա նշել է, որ «պատմական թշնամանքների վերացումը ճանապարհ կհարթի տևական բարեկամության և համագործակցության համար»:

«Մենք պետք է նկատի ունենանք ստեղծված զգայուն իրավիճակը։ Չնայած հակամարտությունը ներկայում սառեցված է, բայց որքան երկարում է Հայաստանի և Ադրբեջանի միջև խաղաղության համաձայնագրի ստորագրումը, այնքան ռազմական գործողությունների մեջ ընկնելու վտանգը մեծանում է»,- ասել է նա:

Պաշտոնյան նշել է, որ երկու «խնդիր» կա, որ Անկարային և Երևանին խանգարել է նորմալ հարաբերություններ զարգացնել Հայաստանի անկախացումից ի վեր։ Դրանցից մեկը, ըստ նրա, առաջին Արցախյան պատերազմն էր, մյուսը՝ Հայոց ցեղասպանության վերաբերյալ տեսակետների բախումը:

Ըստ Աքարի՝ Թուրքիան հավատարիմ է մնում համոզմանը, որ թուրք և հայ ժողովուրդները, որոնք խաղաղության մեջ իրար կողքի ապրելու պատմություն ունեն, կարող են հարաբերություններ հաստատել՝ հիմնված փոխշահավետ համագործակցության վրա ու հաշվի չառնելով մարտահրավերները։