Երևանի քաղաքապետի առաջին տեղակալ, քաղաքապետի պաշտոնակատար Լևոն Հովհաննիսյանը հյուրընկալել է Սերգեյ Փարաջանովի 100-ամյակին նվիրված «Նռան գույնը» հայ - ֆրանսիական պարային ներկայացման ստեղծագործական կազմի անդամներին՝ նախագծի հեղինակ Սաթէ Խաչատրյանին, ֆրանսիական Տոբոգան և Գասկոն թատրոնների տնօրեններ Ռաֆայել Ռիմսկի Կորսակովին և Անտուան Գարիելին, պարուսույց Մուրադ Մերզուկին, բեմանկարիչ Բենժաման Լըբրըտոնին, հագուստի հեղինակ Էդգար Մանուկյանին։
Առաջնախաղը կկայանա 2024թ. հունվարին: Մարտի 15-ին և 16-ին բեմադրությունը կցուցադրվի Երևանում՝ Լիոն-Երևան քույր քաղաքների համագործակցության ծրագրով։ Երևանյան հյուրախաղերի գլխավոր աջակիցն է Երևանի քաղաքապետարանը։
Նախագիծն իրականացվում է ֆրանսիական «Սաթէ-Աթղը» թատերական միության, «Պոլ ան Սցեն» կազմակերպության, «Ժողովրդական երաժշտության և պարի ազգային կենտրոն» ՊՈԱԿ-ի և «Արտ – Իմաժ» մշակութային ՀԿ համատեղ ուժերով:
Հանդիպմանը քննարկվել են ներկայացման հետ կապված խնդիրներ, նաև Երևանի և Լիոնի այլ թատրոնների միջև հետագա հնարավոր գործակցության, մշակութային այլ նախագծերին վերաբերող թեմաներ: Կողմերը վստահություն են հայտնել, որ մշակութային նախագիծն առավել կամրապնդի հայ-ֆրանսիական բարեկամությունն ու երկու քաղաքների միջև փոխգործակցությունը։ Ֆրանսիացի արվեստագետները հետաքրքրվել են նաև Հայաստանի օպերայի և բալետի ազգային ակադեմիական թատրոնի հետ գործակցությամբ:
