Երևանի քաղաքապետարանը ստացել է մետրոպոլիտենի Աջափնյակ կայարանի կառուցման նախագծային աշխատանքների ամբողջական փաթեթը, և այն գտնվում է համալիր փորձաքննության իրականացման փուլում։ Երևանի քաղաքապետարանի երեկ կայացած գործակարգավարական նիստի ժամանակ այս մասին հայտարարել է Երևանի քաղաքապետ Տիգրան Ավինյանը։
«Ես պետք է խնդրեմ, որ այդ աշխատանքներն ամփոփելուց հետո միանգամից մրցույթի դնենք՝ առանց ֆինանսական միջոցների։ Այդ հարցը հընթացս կսկսենք լուծել, բայց արդեն պատրաստ լինենք, որ Աջափնյակ կայարանի շինարարական աշխատանքները պետք է սկսենք»,- ասել է Երևանի քաղաքապետը։
Երևանի քաղաքապետը հանձնարարեց նաև մրցույթի դնել «Սուրմալու» առևտրի կենտրոնի մոտ մետրոյի նոր կայարան կառուցելու նախագծա-նախահաշվային փաստաթղթերը ձեռք բերելու հայտը։
Հավելենք, որ Երևանի մետրոպոլիտենի 10 կայարաններում տեղադրվել են 20 վճարային տերմինալներ՝ միասնական տոմսային համակարգի ծրագրի շրջանակում: Երևանի քաղաքապետարանի գործակարգավարական նիստի ժամանակ այս մասին հայտնել է Երևանի մետրոպոլիտենի գլխավոր տնօրենի ժամանակավոր պաշտոնակատար Բաբկեն Սեդրակյանը։
«Նաև առաջիկա 10 օրվա ընթացքում մետրոպոլիտենը կհամալրվի մեկ շարժակազմով` երեք վագոններով։ 2 շարժակազմ էլ՝ երեք վագոններով գիծ դուրս կգան երկու ամսում, այսինքն՝ 3 ամսում կունենք երեք նոր շարժակազմ՝ երեք վագոններով»,- ասել է նա։
