Մեղրի համայնքի ղեկավար Մխիթար Զաքարյանը հրաժարականի դիմում է ներկայացրել. այս մասին «Լուրերը» տեղեկացավ Սյունիքի մարզպետարանից։ Զաքարյանը լրատվամիջոցներին ասել է, որ հրաժարականը պայմանավորված է ԱԺ պատգամավորական մանդատը վերցնելու հանգամանքով։ Մխիթար Զաքարյանը «Հայաստան» դաշինքի ընտրական ցուցակի 17-րդ համարն է։

Զաքարյանը «Ռադիոլուր»-ի հետ հետ հեռախոսազրույցում ասաց, որ «Հայաստան» դաշինքի կազմով, որի 12-րդ հորիզոնականում է ինքը, հավանաբար մտնելու է խորհրդարան։ Այդ իսկ պատճառով համայնքապետարանում «ճամպրուկային» տրամադրություններ են։ Համայնքի ղեկավարի խոսքով՝ մի քանի բաժինների ղեկավարներ եւ իր տեղակալը հրաժարականի դիմումներ են ներկայացրել։

«Քանի որ ամսի 26-ին կվերցնեմ Ազգային ժողովի պատգամավորի մանդատը, որոշեցի հրաժարական տալ։ Սա թիմային որոշում է, ու որոշեցինք հնարավորություն տալ մեզնից հետո եկող նորեկներին աշխատել՝ առանց ժամանակ կորցնելու»,-ասաց Մխիթար Զաքարյանը։ Նա հերքեց, որ իր վրա ճնշում է եղել։

«Ոչ մեկը չի կարող ճնշել, ես հրաժարականը ներկայացրել եմ իմ կամքով»,-ասաց Մեղրիի համայնքի ղեկավարը։

Հիշեցնենք՝ Մխիթար Զաքարյանը մեղադրվում է պաշտոնեական լիազորությունները չարաշահելու համար: Նա տարեկան 18.000 դրամով 25 տարի ժամկետով Ագարակ համայնքի գյուղատնտեսական նշանակության արոտավայրը վարձակալության է տվել մի քաղաքացու, որն էլ հենց նույն օրը հողատարածքը տարեկան 600.000 դրամով երրորդ կողմին է տվել: 2008-ից մինչև 2021-ի հունվարն ընկած ժամանակահատվածում համայնքի բյուջե 7.350.000 դրամի փոխարեն վճարվել է ընդամենը 3.657.500 ՀՀ դրամ:

Զաքարյանին մեկ այլ քրեական գործով էլ մեղադրանք էր առաջադրվել ՀՀ քրեական օրենսգրքի 258-րդ հոդվածի 3-րդ մասի 1-րդ, 2-րդ և 5-րդ կետերով, այսինքն՝ խուլիգանությունը, որը կատարվել է մի խումբ անձանց կամ կազմակերպված խմբի կողմից, զուգորդվել է իշխանության ներկայացուցչին կամ հասարակական կարգի պահպանության պարտականություն իրականացնող կամ հասարակական կարգի խախտումը խափանող անձին դիմադրություն ցույց տալով և բացառիկ ցինիզմով։