«Մայր Հայաստան» շարժումը որոշել է մասնակցել Երևանի ավագանու ընտրություններին: Այս մասին տեղեկացնում են շարժման ֆեյսբուքյան էջում։
Երևանի նախկին քաղաքապետ Հայկ Մարությանը Ֆեյսբուքի իր էջում տեսանյութ է տարածել՝ տեղեկացնելով, որ պատրաստվում է մասնակցել Երևանի ավագանու առաջիկա ընտրություններին։
ՀՀԿ փոխնախագահ Արմեն Աշոտյանը «Նուբարաշեն» ՔԿՀ-ից գրառում է կատարել՝ տեղեկացնելով, որ ՀՀԿ-ն չի մասնակցի Երևանի ավագանու ընտրություններին։
«Ես չեմ պատրաստվում որևէ կերպ մասնակցել մայրաքաղաքի իշխանությունների ընտրություններին: Նման մոտեցում ունի նաև իմ` Հայաստանի Հանրապետական կուսակցությունը»,- մասնավորապես, գրել է Աշոտյանը։
Հիշեցնենք՝ օգոստոսի 3-ից սկսվել են Երևանի ավագանու ընտրությունների առաջադրումները: Կուսակցությունների, կուսակցությունների դաշինքների ընտրական ցուցակների առաջադրման և գրանցման համար անհրաժեշտ փաստաթղթերը Կենտրոնական ընտրական հանձնաժողով ներկայացվում են 2023 թվականի օգոստոսի 3-ից մինչև օգոստոսի 13-ը՝ մինչև ժամը 18:00-ն:
Կենտրոնական ընտրական հանձնաժողովում կուսակցությունների, կուսակցությունների դաշինքների ընտրական ցուցակների գրանցումը կատարվում է 2023 թվականի օգոստոսի 13-ից մինչև օգոստոսի 18-ը:
Երևանի ավագանու ընտրությունները տեղի կունենան սեպտեմբերի 17-ին:
