Ամբողջովին խեղաթյուրված է իրավիճակը, բացարձակ հիմքեր չկան, հանքը գործում է օրինական հիմքով:

Այս մասին այսօր ԱԺ-ում լրագրողների հետ զրույցում ասել է «Քաղաքացիական պայմանագիր» խմբակցության պատգամավոր Սերգեյ Բագրատյանը, պարզաբանելով երեկ լրատվամիջոցներում տարածված տեղեկությունները, որ իր կինն ավազի ապօրինի հանք է շահագործում:

«Ես լրագրողի հարցին ի պատասխան ասել եմ՝ հանքի տնօրինությունից բոլոր փաստաթղթերը վերցրեք, դրանք առկա են, և կարող եք դրանց հիման վրա ձեր եզրակացությունը անել: Լրագրողը հավանաբար շտապել է և սենսացիոն հոդված է գրել:

Այս պահին կնոջս չի պատկանում, բայց պատկանելու հարցը չի, իրապես օրինական գործունեություն է ծավալում, 3 ամսվա ընկերություն է, 15 միլիոն հարկ է վճարել արդեն»,- ասում է պատգամավորը ցույց տալով ընկերության փաստաթղթերը:

Նա նշեց, որ այդտեղ անգամ ավազի հանք չկա և տեսչական մարմինը տեղյակ է, որ ավազ են լվանում:

Հիշեցնենք, որ երեկ հոդված էր հրապարակվել, որտեղ ասվում էր, որ Արարատի մարզի Ռանչպար բնակավայրում ավազի ապօրինի հանք է շահագործվում։  Հանքարդյունահանողը ԱԺ «Քաղաքացիական պայմանագիր» խմբակցության պատգամավոր Սերգեյ Բագրատյանի կնոջ ՍՊԸ-ն է։ Հանքավայրը շահագործելուց առաջ փորձաքննություններ չեն իրականացվել, հանքարդյունահանման պայմանագիր չի կնքվել։ Հայաստանի սեփականությունը համարվող ընդերքն ամիսներ շարունակ ապօրինի արդյունահանվել է։