Խոշորացված 16 համայնք դրամաշնորհ կստանա համավարակով պայմանավորված տնտեսական զարգացման մարտահրավերների լուծման նպատակով։ Տեղեկացնում է ՏԿԵ նախարարությունը։
Այսօր կայացել է ՇԶՀԳ/ԳՏՀԶՆ դրամաշնորհային հիմնադրամի Գնահատող հանձնաժողովի առցանց նիստը, որտեղ ներկայացվել է համավարակի պատճառով առաջացած տնտեսական զարգացման մարտահրավերների լուծման նպատակով Հայաստանի խոշորացված համայնքներին հատկացված դրամաշնորհային ծրագրերի ընտրության, գնահատման ընթացքը։
Դրամաշնորհները հատկացվում են «Լավ կառավարում հանուն տեղական զարգացման Հարավային Կովկասում» ծրագրի շրջանակում, և նախատեսված են խոշորացված համայնքներում տնտեսական զարգացմանն ուղղված փոքր և միջին ծրագրերին աջակցելուն:
ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանն իր խոսքում կարևորել է համայնքների՝ ծրագրի հիմքում դրված նախաձեռնողականության գաղափարը, ինչը ստիպում է համայնքներին հանդես գալ իրենց առաջնահերթություններից բխող գաղափարներով և զարգացնել դրանք։
ՇՀԶԳ Հարավային Կովկասի գրասենյակի տարածաշրջանային տնօրենի տեղակալ Վերներ Թութը մեկ անգամ ևս փաստել է նախարարության հետ ձևավորված երկարատև և արդյունավետ համագործակցության մասին, ընդգծելով, որ այս ծրագրով ևս նախարարությունը կարողացել է ճիշտ ուղղությամբ ճիշտ աշխատանքներ իրականացնել։
Համայնքներից ներկայացվել է դրամաշնորհային ծրագրին մասնակցության ավելի քան 280 հայտի նախագիծ, որից ուսումնասիրության արդյունքում աշխատանքային խմբի քննարկմանն է ներկայացվել 131 հայտ։ Վերջնական արդյունքում հաստատվել է դրամաշնորհի տրամադրման 16 հայտ Արագածոտնի, Լոռու, Շիրակի, Սյունիքի, Տավուշի, Կոտայքի և Վայոց ձորի մարզերից։
Դրամաշնորհային ընդհանուր ֆոնդը կազմում է շուրջ 450 հազար եվրո, որը հատկացվել է Շվեյցարիայի և Գերմանիայի կառավարությունների կողմից։ Դրամաշնորհները կհատկացվեն 5․000-ից 20 000 եվրոյի շրջանակում, համայնքների համաֆինանսավորման պարագայում, բացառիկ դեպքերում կարող է տրամադրվել մինչև 50.000 եվրո գումար՝ հիմնականում միջհամայնքային նախագծերի համար։
Հանդիպմանն անդրադարձ է կատարվել ծրագրերի իրականացման մեկնարկին վերաբերող հարցերի։