Հայաստանի Հանրապետության կրթության, գիտության, մշակույթի և սպորտի նախարարի պաշտոնակատար Վահրամ Դումանյանը և նախարարի տեղակալ Կարեն Գիլոյանը հյուրընկալել էին Հայաստանի թենիսի հավաքական թիմին, որը հաղթել է 2021 թվականի Դևիսի գավաթի խաղարկության չորրորդ ենթախմբում և հաջորդ տարի կմասնակցի երրորդ ենթախմբի մրցաշարին: Հաղթանակներից մեկը Հայաստանի հավաքականը տոնել է Ադրբեջանի մարզիկների նկատմամբ: Դումանյանն իր գոհունակությունը և շնորհակալությունը հայտնեց թիմի անդամներին մարզչական շտաբին և ֆեդերացիայի ներկայացուցիչներին: «Շնորհակալություն ձեզ մեզ նման մեծ հպարտության առիթ տալու համար: Մեր ունեցած հնարավորությունների սահմաններում աջակցելու ենք ձեզ առաջիկա գործունեությունում»,-ասաց նախարար Դումանյանը:
Հայաստանի հավաքականի գլխավոր մարզիչ Վահե Ավետիսյանն էլ իր խոսքում շեշտեց, որ թիմը հաղթահարեց 4-րդ ենթախմբի արգելքը և այժմ հանդես կգա 3-րդ խմբում: «Ադրբեջանի դեմ մրցախաղը մեր պատերազմն էր, այն պատերազմը, որը հաղթեցինք: Սա մեր բոլորի հաղթանակն է` երկրի, ժողովրդի, ֆեդերացիայի»,-ասաց մասնագետը:
Ավետիսյանը նաև բարձրաձայնեց, որ թենիսիստների զինծառայության հետ կապված դժվարություններ են ունենում և հույս հայտնեց, որ մարզիկներին հնարավորություն կտրվի ԲԿՄԱ-ում իրենց ծառայությունն անցնելու:
Հավաքական թիմը որպես նվեր նախարարին փոխանցեց Դևիսի գավաթի խաղարկության գնդակը` հավաքական թիմի անդամների ստորագրությամբ:
Հյուսիսային Մակեդոնիայի մայրաքաղաք Սկոպյեում ավարտվել է Դևիսի գավաթի խաղարկության եվրոպական գոտու չորրորդ ենթախմբի մրցումը, որին մասնակցել է նաև Հայաստանի թենիսի տղամարդկանց հավաքականը: Մեր ընտրանին (կազմը՝ Միքայել Ավետիսյան, Սեդրակ Խաչատրյան, Հենրիկ Նիկողոսյան, Նադիր Սարգսյան, մարզիչ՝ Վահե Ավետիսյան) Չեռնոգորիայի, Ադրբեջանի և Ալբանիայի հավաքականների հետ պայքարում A խմբում զբաղեցրել է երկրորդ հորիզոնականը և հնարավորություն ստացել արդեն 2022 թվականին հանդես գալու Դևիսի գավաթի երրորդ ենթախմբի մրցմանը: Ալբանիայի և Ադրբեջանի հետ հանդիպումներում Հայաստանի հավաքականը նույն՝ 2:1 հաշվով հաղթանակ է տոնել, իսկ վերջին տուրում զիջել է Չեռնոգորիային: Դևիսի գավաթի երրորդ ենթախումբ են դուրս եկել խմբերում 1-2-րդ հորիզոնականները զբաղեցրած թիմերը:
