Իսրայելը սկսում է Գազայի հատվածի ամբողջական շրջափակումը՝ դադարեցնելով պաղեստինյան անկլավին սննդի, վառելիքի և էլեկտրաէներգիայի մատակարարումները։ Այդ մասին երկուշաբթի հայտարարել է հրեական պետության պաշտպանության նախարար Յոավ Գալանտը։
«Չեն լինի էլեկտրականություն, սնունդ կամ վառելիք: Մենք կռվում ենք բարբարոսների դեմ և համաժեք պատասխան կտանք»,- օպերատիվ խորհրդակցությունից հետո ասել է նա:
Պաղեստինա-իսրայելական հակամարտության կտրուկ սրման հետևանքով երկու կողմից հարյուրավոր խաղաղ բնակիչներ են զոհվել։
Իսրայելական բանակի հարվածների հետևանքով զոհված պաղեստինցիների թիվը հասել է 560-ի, հայտնել է Պաղեստինի առողջապահության նախարարությանը։ Վիրավորվել է 2900 պաղեստինցի:
Պաղեստինյան ՀԱՄԱՍ շարժման հարձակումների հետևանքով Իսրայելում զոհվածների թիվը հասել է 800-ի։ Այդ մասին հայտնում է իսրայելական The Times of Israel հրատարակությունը։
Թարմացված տվյալների համաձայն՝ ավելի քան 2200 մարդ վիրավորվել է, ևս 100-ից ավելին գտնվում է ՀԱՄԱՍ-ի գերության մեջ։
ՄԱԿ-ի Անվտանգության խորհուրդը փակ նիստ է անցկացրել Մերձավոր Արևելքում տիրող իրավիճակի վերաբերյալ, սակայն դրանից հետո որևէ հայտարարություն չի արվել՝ չնայած ՀԱՄԱՍ-ին դատապարտելու վերաբերյալ Իսրայելի կոչերին։
Իսրայելն անցած գիշերվա ընթացքում ավիացիոն հարվածներ է հասցրել ՀԱՄԱՍ-ի և Գազայի հատվածի «Իսլամական ջիհադի» ավելի քան 500 օբյեկտների: Այս մասին հայտարարել են իսրայելցի զինվորականները:
ԶԼՄ-ները, հղում անելով Իսրայելի բանակի ներկայացուցչին, հաղորդում են, որ ակտիվ ռազմական գործողություններ են վարվում Գազայի հատվածի հետ սահմանային ևս վեց շրջաններում:
ՄԱԿ-ի Անվտանգության խորհրդի նիստն ավարտվել է` առանց Գազայի իրադարձությունների վերաբերյալ հայտարարության ընդունման: Այն սահմանափակվել է քննարկմամբ:
Անհետաձգելի բժշկական օգնության ZAKA ծառայության կամավորները Իսրայելի հարավային շրջանում՝ Ռեիմ կիբուցում անցկացված երաժշտական փառատոնի մասնակիցների 260 մարմին են հայտնաբերել, գրում է The Jerusalem Post-ը: Հաղորդվում է՝ նրանք սպանվել են ՀԱՄԱՍ-ի զինյալների կողմից:
Նշվում է, որ փառատոնի սպանված մասնակիցների ընդհանուր թիվը կարող է ավելին լինել:
Ավելի վաղ հաղորդվել էր, որ փառատոնի կազմակերպչի՝ 22-ամյա Շանի Լուկի դին նրա մայրը ճանաչել էր ոտքի դաջվածքով: Աղջկա մասնակցությամբ տեսանյութը հայտնվել էր սոցցանցերում: Դրանում պաղեստինցի զինյալները վիրավոր աղջկան տեղափոխում էին բաց թափքով մեքենայով: