«Ներկայումս իրականացվում են կահավորման աշխատանքներ Հերացի փողոցում՝ ավտոբուսի առանձնացված գիծ ունենալու մասով: Մեկ-երկու օր աշխատանքները հետաձգվեցին եղանակային պայմանների պատճառով, ենթադրում եմ՝ այսօր կամ վաղը ամբողջությամբ ավարտված կլինեն կահավորման աշխատանքները, և ավտոբուսի գիծը կսկսի գործել»:
Այս մասին այսօր՝ Երևանի քաղաքապետարանի հերթական գործակարգավարական նիստի ժամանակ, ասաց Տրանսպորտի վարչության պետի պաշտոնակատար Վազգեն Հարությունյանը:
Խոսելով Երևանի կենտրոնի բեռնաթափմանն ուղղված աշխատանքներից՝ Հարությունյանն ասաց. «Այս շաբաթվա ընթացքում պլանավորվում է կիրառվել սահմանափակումներ ծանր ավտոմեքենաների մուտքի մասով: Փոքր կենտրոնում՝ Խանջյանից մինչև Սարյան, ինչպես նաև Գրիգոր Լուսավորիչից մինչև Կորյուն շրջանակում ներառված փողոցներում կարգելվի երթևեկությունը առավելագույնը 2.5 տոննա բեռնվածության զանգված ունեցող բեռնատարների համար: Ժամային սահամանփակումը կլինի առավոտյան 7-ից մինչև 21:00-ն, այսինքն՝ տվյալ տիպի տրանսպորտային միջոցները հնարավորություն կունենան մուտք գործել տվյալ՝ թվով 40 փողոցներ ու պողոտաներ ժամը 21:00-ից մինչև 07:00 ընկած հատվածում»:
Արձագանքելով՝ Տիգրան Ավինյանը նշեց, որ Երևան քաղաքում ծանրաբեռնվածությունը թեթևացնելու համալիր ծրագիր են մշակել, որը առաջին հերթին ներառում է ծանր ավտոմեքենաների երթևեկության սահմանափակում, կայանտեղիների որոշակի և՛ գնային, և՛ զոնավորման վերանայումներ, ավտոբուսային գծերի ավելացումներ:
«Ապագայում ենթադրելու է նաև որոշակի փողոցների տարբեր ժամերի կամ օրերի ավտոմեքենաների համար մուտքի արգելք, որովհետև այս ավելացող մեքենաների ծավալը քաղաքը ուղղակի չի կարող սպասարկել: Մեր խնդիրն է ամբողջացնել հանրային տրանսպորտի մեր համակարգը, հնարավորություններ ավելացնել միայն և միայն հանրային տրանսպորտի համար, առավելությունը տալ միայն և միայն հանրային տրանսպորտին, և անհատական մեքենաների համար մտցնել նոր սահմանափակումներ, որոշակի թանկացումներ: Սա անխուսափելի ծրագիր է, որը հեշտ ճանապարհ չի լինելու»,- ընդգծեց Ավինյանը:
