ՀՀ ԱԺ տնտեսական հարցերի մշտական հանձնաժողովը Բաբկեն Թունյանի նախագահությամբ հուլիսի 1-ին հրավիրած արտահերթ նիստում երկրորդ ընթերցմամբ քննարկեց ԱԺ պատգամավոր Արտակ Մանուկյանի ««Քաղաքաշինության մասին» օրենքում լրացում կատարելու մասին» օրենքի նախագիծը, որը նախօրեին ընդունվել էր առաջին ընթերցմամբ: Օրենքի նախագծով սահմանվում է, որ «Գնումների մասին» ՀՀ օրենքով նախատեսված պատվիրատուների կողմից ձեռք բերվող շինարարական աշխատանքների կատարման ամբողջ ընթացքում կապալառու կազմակերպությունն իր հաշվին շինարարական օբյեկտի տարածքը պետք է համալրի տեսախցիկներով, որոնք պետք է շուրջօրյա տեսանկարահանեն ամբողջ շինարարական հրապարակը` ընդգրկելով դրա վրա կառուցվող բոլոր տեսակի շինությունները, եւ այդ տեսախցիկներին հասանելիություն պետք է տրվի ինչպես պատվիրատուին, այնպես էլ գրանցված օգտատերերին: Հեղինակի կարծիքով` դա նաեւ կմեծացնի հանրային հսկողության գործիքակազմերը, իսկ նախագծի ընդունումը կմոտեցնի այս բնագավառում առկա խնդիրների լուծմանը, ինչպես նաեւ հնարավորություն կընձեռի խստացնել հսկողական ընթացակարգերը ստանդարտների պահպանման տեսանկյունից:
Նշվեց, որ առաջին ընթերցումից հետո Կառավարությունն առաջարկել է տեխնիկական բնույթի երկու փոփոխություն: Ըստ ՀՀ քաղաքաշինության կոմիտեի նախագահի տեղակալ Դավիթ Գրիգորյանի` հոդվածների տեղափոխություն է իրականացվել, եւ գործադիրը նպատակահարմար է գտնում տեսաձայնագրման փոխարեն կիրառել տեսանկարահանման սարքեր, որոնք ընդունվել են հիմնական զեկուցողի կողմից:
Երկրորդ ընթերցմամբ քննարկվեց Կառավարության հեղինակած «Վարչական իրավախախտումների վերաբերյալ ՀՀ օրենսգրքում լրացումներ կատարելու մասին» եւ ««Հայաստանի Հանրապետությունում ստուգումների կազմակերպման եւ անցկացման մասին» օրենքում լրացում կատարելու մասին» նախագծերի փաթեթը, որով սահմանվում են արտադրական կանեփի արտադրությամբ զբաղվող անբարեխիղճ տնտեսվարողների համար տուգանքի չափեր:
ՀՀ էկոնոմիկայի նախարարի տեղակալ Տիգրան Գաբրիելյանը տեղեկացրեց, որ առաջին ընթերցումից հետո առաջարկներ չեն ներկայացվել:
Հանձնաժողովականները դրական եզրակացություն տվեցին օրենսդրական նախաձեռնություններին:
