Հայաստանը կարող է դառնալ «Հյուսիս-հարավ» միջազգային տրանսպորտային միջանցքի (ՄՏՄ) և այլ լոգիստիկ նախագծերի լիիրավ մասնակից, կարող է նաև Հնդկաստանի, Իրանի և ԵԱՏՄ երկրների միջև կամուրջ դառնալ։
Այս մասին «Նոր իրողություններ և խաղաղության խաչմերուկ» փորձագիտական համաժողովի ժամանակ ասել է ՀՀ արտգործնախարարի տեղակալ Մնացական Սաֆարյանը:
«Իրանը ԵԱՏՄ-ի հետ ազատ առևտրի գոտու մասին պայմանագիր ունի, իսկ Հնդկաստանը բանակցությունների փուլում է։ Հայաստանը, որպես միության անդամ, կարող է կամուրջ հանդիսանալ Թեհրանի, Դելիի և կազմակերպության մյուս անդամ երկրների համար»,- նկատել է Սաֆարյանը։
Նա նաև հավելել է, որ ՀՀ կառավարությունն ավելի մեծ նախապատվություն է տալիս համագործակցությանը տարածաշրջանային և գլոբալ նախաձեռնությունների շրջանակներում, ինչպիսիք են «Հյուսիս-հարավ» միջազգային տրանսպորտային միջանցքը, «Պարսից ծոց-Սև ծով» ՄՏՄ-ն և Չաբահար նավահանգստի զարգացման իրանա-հնդկական նախաձեռնության զարգացման ծրագրերը:
«Վստահ ենք, որ հայկական տրանսպորտային ցանցը մեծ ներուժ ունի այդ նախագծերին աջակցելու համար»,- ասել է Սաֆարյանը։
Ավելի վաղ մեկնարկել էր հայկական, իրանական, հնդկական և վրացական վերլուծական կենտրոնների փորձագետների մասնակցությամբ անցկացվող «Տարածաշրջանային նոր իրողությունները և «Խաղաղության խաչմերուկը»» խորագրով փորձագիտական համաժողովը։