Մեծ հանդիսավորությամբ այսօր նշվել է ՌԴ ՊՆ Արտաշատի սահմանապահ զորամասի կազմավորման 66-ամյակը, որին ներկա է եղել նաև Արարատի մարզպետ Ռազմիկ Թևոնյանը:
Միջոցառումը մեկնարկել է հանդիսավոր զորահանդեսով, որի ժամանակ սպայական անձնակազմը և զինծառայողները, վետերանները Հայաստանի սահմանները պաշտպանելու, մարդկային բարձր արժանիքների, պատասխանատվության և պարտքի բարձր գիտակցման համար արժանացել են պատվոգրերի, շնորհակալագրերի:
Շնորհավորելով զորամասի կազմավորման առիթով՝ մարզպետը սահմանապահ ծառայողներին մաղթել է քաջառողջություն և խաղաղ երկինք. «Թող հայ-ռուսական եղբայրությունը դարերով շարունակական լինի: Շնորհակալություն ձեզ հայ-թուրքական սահմանին իրականացվող ծառայությունների համար»:
Արտաշատի սահմանապահ ջոկատի հրամանատար, գնդապետ Անդրեյ Զինովի խոսքով՝ սահմանապահները պատվով են կատարել և կշարունակեն կատարել ՀՀ պետական սահմանի պաշտպանությունը:
«Շնորհավորում եմ բոլորիս մեր զորամասի կազմավորման 66-րդ տարեդարձի կապակցությամբ: Ցանկանում եմ բարեկեցություն, քաջառողջություն և երջանկություն», — շնորհավորանքի իր խոսքում ասել է Զինովը:
Ներկաները նաև ծաղիկներ են խոնարհել հայրենիքի համար իրենց կյանքը զոհած զորամասի սահմանապահներին նվիրված հուշակոթողի առաջ:
Հանդիսավոր նիստի փակման արարողությունն ամփոփվել է զինվորական տոնական համերգով:
