Գործարանի տարածքում հրաձգության հետևանքներն առկա են, երկու վիրավորներն էլ առաջին բուժօգնություն ստանալուց անմիջապես հետո տեղափոխվել են բժշկական կենտրոն՝ հետագա բժշկական օգնություն ցուցաբերելու նպատակով: Երասխ այցելած Հայաստանում հավատարմագրված միջազգային դիվանագիտական կորպուսի ներկայացուցիչներին ադրբեջանական ագրեսիայի հետևանքներին ծանոթացնելով՝ մանրամասնեց 5-րդ բանակային կորպուսի հրամանատար, գնդապետ Սասուն Բադասյանը:
«Հենց այստեղ են վիրավորվել գործարանի կառուցման շինարարության վրա աշխատող Հնդկաստանի երկու քաղաքացիները, ովքեր զինվորական ծառայության մեջ ընդհանրապես ընդգրկված չեն, իրենց քաղաքացիական պարտքն են կատարում իրենց կողմից նախընտրելի գործարանում: Հակառակորդը մշտապես խախտում է հրադադարի ռեժիմը, մենք էլ շարունակում ենք մեր ծառայությունն իրականացնել պետական սահմանի պահպանման գործում»,-մանրամասնեց նա:
Գնդապետը նկատեց, որ գործարանը գտնվում է սահմանից 400 մետր հեռավորության վրա, որտեղից անզեն աչքով էլ նկատելի են հակառակորդի դիրքերը:
Արարատի մարզի Երասխ համայնքի վարչական ղեկավար Սարո Այվազյանը վստահեցնում է, որ վերջին երկու օրերին Ադրբեջանի կողմից բնակավայրում կառուցվող գործարանի ուղղությամբ կրակոցների հետևանքով Երասխի բնակիչների շրջանում որևէ խուճապ չկա, գործարանի կառուցման աշխատանքներն էլ նույն տեմպով շարունակվելու են։
«Արմենպրես»-ի հետ զրույցում Այվազյանն ընդգծեց, որ ադրբեջանցիները Երասխի հատվածում սկսել են կրակել վերջին երկու օրերին, կրակոցները կարճ են տևել՝ 15-20 րոպե, թիրախում եղել է հայ և ամերիկացի գործարարների կողմից կառուցվող մետալուրգիական գործարանը։
«Նրանք ցանկանում են խափանել գործարանի կառուցումը, թույլ չտալ, որ մեր երկրի տնտեսությունը զարգանա։ Հիմնական պատճառը սա է»,- ասաց Երասխ համայնքի վարչական ղեկավարը։
Կառուցվող գործարանն ադրբեջանական դիրքերից 400 մետր հեռավորության վրա է, նրանց անմիջական թիրախի տակ է, սակայն, Սարո Այվազյանի խոսքով, գործարանի ղեկավարությունը հաստատակամ է շինարարությունը նույն տեմպերով շարունակելու հարցում։
«Գյուղում էլ տրամադրությունների անկում չկա, բնականոն կյանքը շարունակվում է։ Երասխում հիմա սպորտդպրոց է կառուցվում, գազաֆիկացման աշխատանքներ են իրականացվում։ Բոլոր աշխատանքներն արվում են, խուճապ ընդհանրապես չկա»,- մանրամասնեց Սարո Այվազյանը։
Նրա խոսքով՝ Երասխում չկա մի բնակիչ, որին կարող են վախեցնել ադրբեջանական կողմի կրակոցները։ Այվազյանը վստահեցնում է՝ գյուղից հեռանալ ցանկացողներ չկան, իսկ այն պահից, ինչ սկսվել է մետալուրգիական գործարանի կառուցումը, գյուղից նաև արտագնա աշխատանքի մեկնողներ չկան։
Գործարանի շինարարական աշխատանքների վրա աշխատում են հիմնականում Երասխի և հարակից գյուղերի բնակիչներ, նաև՝ օտարերկրացիներ։ Սարո Այվազյանն ընդգծում է՝ որքան գործարանի շինարարությունն առաջ գնա, իսկ գործարանն ընդլայնվի, այնքան շատ աշխատատեղեր են լինելու։
