ԱԳ նախարարի խորհուրդը քննարկել է Հայաստանի հետ համագործակցությունն ամրապնդելու և ժողովրդավարական ճանապարհով ընտրված իշխանություններին աջակցելու ուղիները, անվտանգության հարցերը և երկրում բարեփոխումների շարունակականությունը, հայտարարել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը՝ ԵՄ արտաքին հարաբերությունների խորհրդի նիստից հետո կայացած մամուլի ասուլիսում։
«Մենք որոշեցինք ուժեղացնել առաքելությունը Հայաստանում՝ ավելի շատ ծառայողներով և ավելի շատ պարեկներով սահմանի զգայուն հատվածներում: Եվ մենք կուսումնասիրենք Հայաստանին հնարավոր աջակցությունը Եվրոպական խաղաղության հիմնադրամի շրջանակներում և Հայաստանի համար վիզային ռեժիմի ազատականացման տարբերակը»,- ասել է նա:
«Մենք պետք է շատ զգոն լինենք Հայաստանի ապակայունացման ցանկացած փորձի դեպքում՝ թե՛ ներքին, թե՛ արտաքին։ Իսկ Ադրբեջանին ուղղված մեր ուղերձը հստակ է՝ Հայաստանի ինքնիշխանության և տարածքային ամբողջականության ցանկացած խախտում անընդունելի է լինելու և ծանր հետևանքներ կունենա մեր հարաբերությունների համար»,- ասել է ԵՄ արտաքին քաղաքականության պատասխանատուն։
Նա կոչ է արել վերսկսել բանակցությունները Հայաստանի և Ադրբեջանի միջև՝ հիմնվելով Եվրամիության խորհրդի նախագահ Շառլ Միշելի կատարած աշխատանքի վրա։
«Անհրաժեշտ է, որ կնքվի խաղաղության պայմանագիր, և մենք պարտավոր ենք շարունակել մեր միջնորդական դերը», — ասել է Բորելը:
Նա տեղեկացրել է, որ ԵՄ ԱԳ նախարարները որոշել են հրավիրել Հայաստանի արտգործնախարար Արարատ Միրզոյանին՝ Արտաքին հարաբերությունների խորհրդի հաջորդ հանդիպման շրջանակներում միանալու իրենց։