Թուրքիայի արտաքին գործերի նախարար Մևլութ Չավուշօղլուն հայտարարել է, որ Հայաստանի արտաքին գործերի նախարար Արարատ Միրզոյանը և Հայաստան-Թուրքիա երկխոսության գործընթացում Հայաստանի հատուկ ներկայացուցիչ Ռուբեն Ռուբինյանը կմասնակցեն Անթալիայի դիվանագիտական ֆորումին: «Արմենպրես»-ի փոխանցմամբ՝ այս մասին հայտնում է Dailysabah-ը: Անթալիայի դիվանագիտական ֆորումը կանցկացվի մարտի 11-14-ը:
Ավելի վաղ Թուրքիայի ԱԳ նախարարը հայտարարել էր, որ Հայաստանի արտաքին գործերի նախարարին հրավիրել են մասնակցել Անթալիայի դիվանագիտական ֆորումին: Հայաստանի ԱԳ նախարարությունը հայտնել էր, որ Արարատ Միրզոյանը ստացել և շարունակում է ստանալ այս տարվա ընթացքում տարատեսակ միջոցառումների, այդ թվում՝ Անթալիայի դիվանագիտական ֆորումին մասնակցության հրավերներ։ «ՀՀ ԱԳ նախարարությունը համապատասխան ընթացակարգով քննարկում է նախարարի՝ վերոնշյալ միջոցառումներին մասնակցության նպատակահարմարությունը»,- ասված էր ՀՀ ԱԳ նախարարության հաղորդագրության մեջ։
