Հայկական Ժամանակը գրում է.
Արմեն Չարչյանի պաշտպան Արամ Վարդևանյանն այսօր լրագրողների հետ զրույցում անդրադառնալով Չարչյանի նկատմամբ հարուցված քրեական գործին, նշել է, որ գործը հարուցվել է ՀՔԾ խոսնակի ներկայացրած զեկուցագրի հիման վրա։
«Արմեն Չարչյանի գործը հարուցվել է մամուլի խոսնակի զեկուցագրի հիման վրա։ Մի հատ էլ դրան ավելացում` օգտագործվել է անանուն աղբյուր` «Բաղրամյան 26»-ում (տելեգրամյան ալիք) հրպարակված, որը հետագայում պարզվեց` մոնտաժված ձայնագրություն է»,– ասել է Վարդևանյանը։
Լրագրողների դիտարկմանը, որ տեսագրությունն իրավապահներին է ներկայացրել Դանիել Իոաննիսյանի ղեկավարած «Անկախ դիտորդ» ՀԿ–ն, Վարդևանյանը նշել է. ««Անկախ դիտորդը» չի ուղարկել, «Բաղրամյան 26»-ում հրապարակվել է, ՀՔԾ–ի մամուլի խոսնակը զեկուցագիր է կազմել ու դրա հիման վրա քրեական գործ է հարուցվել»։
Ի պատասխան Վարդևանյանի հայտարարության, ՀՔԾ -ից ՀԺ-ին հայտնեցին, որ այս կապակցությամբ արդեն իսկ իրենց կողմից պարզաբանում տրվել է, որ քրեական գործի հարուցման հիմք են հանդիսացել զեկուցագրի հիման վրա նախապատրաստված նյութերը.«Այսինքն`քրեական գործը հարուցվել է ոչ թե զեկուցագրի, այլ դրա առթիվ նախապատրաստված նյութերի հիման վրա: «Հայաստան» դաշինքի թեկնածուի կողմից նախընտրական փուլում իրեն ենթակա աշխատակիցների նկատմամբ ճնշում գործադրելու վերաբերյալ զեկուցագիրը ներկայացվել է ՀՀ հատուկ քննչական ծառայության պետին, որից հետո նրա հանձնարարությամբ նախապատրաստվել են նյութեր, որոնց շրջանակներում էլ վարույթն իրականացնող մարմինն իրականացրել է անհրաժեշտ ստուգողական գործողություններ, այդ թվում`ուսումնասիրել հայտնի ձայնագրությունը»,-հայտնեցին ՀՔԾ-ից:
Հիշեցնենք, որ դատարանն օրեր առաջ Չարչյանին կալանավորելու որոշում է կայացրել: Դատարանի որոշման հրապարակումից առաջ նա տեղափոխվել է «Շենգավիթ» ԲԿ: «Իզիմիրլյան» ԲԿ-ի տնօրեն, «Հայաստան» դաշինքի պատգամավորի թեկնածու Արմեն Չարչյանը մեղադրվում է ընտրություններին մասնակցելուն հարկադրելու համար:
