Shamshyan.com-ի տեղեկություններով՝ հոկտեմբերի 3-ին ՀՀ ներքին գործերի նախարարության Ոստիկանության քրեական ոստիկանության գլխավոր վարչությունում ստացված օպերատիվ տեղեկություններով՝ վարչության ծառայողները Պարեկային գնդի ծառայողների հետ իրականացրել են օպերացիա, որը կրել է «Օպերկոտ աջից» անվանումը:
Ոստիկանները Մյասնիկյան պողոտայում ձերբակալել և ոստիկանության Նոր Նորքի բաժին են տեղափոխել Երևանի բնակիչներ 32-ամյա Ադամ Պ.-ին, 32-ամյա Հովհաննես Պ.-ին և 40-ամյա Կարեն Ա.-ին: Վերջիններս եղել են BMW մակնիշի ավտոմեքենայով:
Կայքի տեղեկություններով՝ ոստիկանության քրեական ոստիկանության գլխավոր վարչությունում օպերատիվ տվյալներ էին ստացվել, որ նշված անձինք Գայի պողոտայի 19/95 հասցեի մոտ տեղադրված տերմինալը տեխնիկական միջոցների գործադրմամբ կոտրել են և այնտեղից գողացել դրամապահոցը:
Եռյակին բռնելուց հետո պարզվել է, որ ստացված օպերատիվ տեղեկությունը հավաստի է, և նրանցից մեկի մոտ գտնվող ձեռքի պայուսակում հայտնաբերվել է գողացված 23 հատ 20.000, 6 հատ 10.000, 6 հատ 5.000, 1 հատ 2.000 և 55 հատ 1.000 թղթադրամներ, իսկ BMW-ում էլ՝ հափշտակված դրամապահոցը:
Երբ իրավապահները փորձել են նրանց ձերբակալել, վերջիններս հայտարարել են, թե իրենք մարտարվեստի գիտակներ են, որ իրենցից մեկին կոչում են «Վանդամ», մեկին՝ «Չակ Նորիս», մյուսին էլ՝ «Շվարցնեգեր»:
Նշված անձինք և կազմված փաստաթղթերը ներկայացվել են ՀՀ քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժին, որտեղ դեպքի փաստով նախաձեռնվել է քրեական վարույթ:
