Ռուսաստանի նախագահական ընտրությունները միջազգային մեծ նշանակություն կունենան, քանի որ ոչ մի համաշխարհային խնդիր չի կարող լուծվել առանց Մոսկվայի մասնակցության, ասել է Ղազախստանի ղեկավար Կասիմ-Ժոմարտ Տոկաևը «Egemen Qazaqstan» («Ինքնիշխան Ղազախստան») ազգային թերթին տված հարցազրույցում։ 

«Մենք պետք է հասկանանք, որ Ռուսաստանի Դաշնությունը չափազանց կարևոր դեր է խաղում համաշխարհային քաղաքականության մեջ և ունի ՄԱԿ-ի Անվտանգության խորհրդի մշտական անդամի կարգավիճակ: Ռուսաստանի նախագահ Վլադիմիր Պուտինը առաջնորդ է, ով իր խոսքերով և գործողություններով էապես ձևավորում է համաշխարհային օրակարգը: Աշխարհում ամեն ինչ դիտարկվում է Ռուսաստանի կարծիքով, առանց այդ պետության մասնակցության ոչ մի համաշխարհային խնդիր չի կարող լուծվել, և դա փաստ է»,- ասել է նա։

Ղազախստանի նախագահի խոսքով, գալիք տարին նշանակալից է լինելու շատ երկրների համար. Ռուսաստանից բացի, նախընտրական քարոզարշավներ կանցկացվեն ԱՄՆ-ում, Ադրբեջանում, Մեծ Բրիտանիայում, Հնդկաստանում և այլ երկրներում, տեղի կունենան Եվրախորհրդարանի ընտրություններ, սակայն Ռուսաստանում ընտրությունները հատկապես հետաքրքրություն են ներկայացնում Ղազախստանի համար՝ Աստանայի և Մոսկվայի միջև հարաբերությունների բարձր մակարդակի պատճառով, ընդգծել է Տոկաևը։

ՌԴ նախագահական ընտրությունները նշանակված են 2024 թվականի մարտի 17-ին։ Առաջին անգամ քվեարկությունը կտևի երեք օր՝ մարտի 15-ին, 16-ին և 17-ին։