Արևելյան գործընկերությունը վերականգնման, կայունության և բարեփոխումների նոր օրակարգ է մշակում, որի հիմքում ընկած է տնտեսական և ներդրումային ծրագիրը:
Եվրահանձնաժողովը և ԵՄ արտաքին քաղաքականության և անվտանգության հարցերով գերագույն հանձնակատարը ներկայացրել են առաջարկ այն մասին, թե ինչպես կարելի է առաջիկա տարիներին առաջ քաշել ԵՄ արևելյան գործընկերների հետ համագործակցության առաջնահերթությունները:
Օրակարգը հիմնված կլինի 2.3 մլրդ եվրո արժողությամբ տնտեսական և ներդրումային ծրագրի վրա՝ դրամաշնորհների տեսքով, որը հնարավորություն կտա հավաքել մինչև 17 մլրդ եվրո պետական ու մասնավոր ներդրումներ: Առաջարկը կքննարկվի Արևելյան գործընկերության հետագա քաղաքականության վերաբերյալ 2021-ի դեկտեմբերին նախանշված Արևելյան գործընկերության գագաթնաժողովի ժամանակ:
Արևելյան գործընկերությունը ստեղծվել է 2009-ին, որի նպատակն է ամրապնդել ու խորացնել ԵՄ-ի անդամ երկրների և կառույցի՝ Արևելյան Եվրոպայի և Հարավային Կովկասի գործընկեր երկրների՝ Հայաստանի, Ադրբեջանի, Բելառուսի, Վրաստանի, Մոլդովայի և Ուկրաինայի հետ քաղաքական ու տնտեսական հարաբերությունները:
Գործընկերությունը զարգացել է՝ համաձայն յուրաքանչյուր գործընկերոջ շահերի, հավակնությունների ու առաջընթացի՝ ընդհանուր և գլոբալ մարտահրավերներին դիմակայելու և տարածաշրջանային ինտեգրումը խթանելու համար: