Առաջարկվում է Սեւանա լճից ջրառի՝ 170 մլն խորանարդ մետր չափաքանակն ավելացնել մինչեւ 240 մլն խորանարդ մետր՝ պայմանավորված տարվա եղանակային պայմաններով, ջրավազանների եւ ջրամբարների լցվածությամբ ու գետերի ջրատվության հիմնական ցուցանիշներով: ««Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին» օրենքի նախագիծն ԱԺ հուլիսի 11-ի արտահերթ նստաշրջանում ներկայացնելիս այս մասին հայտնել է ՀՀ տարածքային կառավարման եւ ենթակառուցվածքների նախարարի տեղակալ Վաչե Տերտերյանը:
Նախագծով, ինչպես պահանջում է օրենքը, սահմանվում են լրացուցիչ ջրաքանակի բացթողնմամբ պայմանավորված արտադրված էլեկտրաէներգիայի ծախսման ընթացակարգը եւ ուղղությունները: Վաչե Տերտերյանը տեղեկացրել է, որ իրավիճակի մասին պարբերաբար հրապարակավ եւ հանրային հաղորդումներ են ներկայացվել:
Պատգամավորներ Սերգեյ Բագրատյանի, Գեւորգ Պապոյանի, Լիլիթ Ստեփանյանի, Հովիկ Աղազարյանի, Արծվիկ Մինասյանի հարցերին ի պատասխան՝ Վաչե Տերտերյանը պարզաբանել է, որ այս տարի Սեւանից ջրառը սկսվել է մայիսի 14-ից, իսկ անցած տարի՝ հունիսի 3-ից, այսինքն՝ շուրջ կես ամիս ավելի շուտ է սկսել գործընթացը: Ներկայացնելով Սեւանից ջրառի ցուցանիշները՝ փոխնախարարը հայտնել է, որ մինչ այսօր Սեւանից վերցվել է 82,3 մլն խորանարդ մետր, Արփա-Սեւան թունելի հիդրոտեխնիկական համակարգով դեպի Սեւան տեղափոխվել է 81,38 մլն խորանարդ մետր: «Նույն ցուցանիշը 2022 թվականին եղել է 148 մլն խորանարդ մետր: Սա վկայում է, որ մենք այս տարի, իսկապես, ունենք ջրի լուրջ պակասուրդ»,- ասել է Վաչե Տերտերյանը:
«Այսօրվա դրությամբ ունենք 1956 սմ, այսինքն` մայիսի 14-ից հետո Սեւանի մակարդակը 13 սմ բարձրացել է: Դա այն դեպքում, երբ մեր ոռոգման համար վերցված ջուրը եւ Արփա-Սեւանով տեղափոխված ջուրը համարյա համարժեք են»,- արձանագրել է փոխնախարարը:
Ռիսկերից խոսելով՝ նա տեղեկացրել է, որ օրենքի համաձայն՝ հարցը քննարկվել է ԳԱԱ Սեւանի լճի պահպանության փորձագիտական հանձնաժողովի հետ: Ըստ նրանց եզրակացության՝ ջրառը պետք է թողնել 170 մլն խորանարդ, բացասական կարծիք է տրվել լրացուցիչ ջրառին:
Պատգամավոր Արծվիկ Մինասյանը կարծիք է հայտնել, որ մինչեւ 2019 թվականի կարգավորումներով կար լրացուցիչ ջրառի հնարավորություն, սակայն 2019 թվականի օրենքով ջրի բացթողումը բացառվելու էր, եթե բալանսը բացասական է: «Հիմա դուք, խախտելով ձեր ընդունած օրենքը, հայտարարում եք այլ բան»,- ասել է նա: Գեւորգ Պապոյանն էլ հավելել է. «Կարող ենք մերժել, խնդիր չկա, բայց եթե ջրաքանակը սպառվեց, ասենք, օգոստոսի 5-ին, ի՞նչ ենք պատասխանելու Արմավիրի եւ Արարատի մարզերի մեր հարյուր հազարավոր քաղաքացիներին. 600.000 մարդ է ապրում այնտեղ այդ ջրի հաշվին»,- ասել է «Քաղաքացիական պայմանագիր» խմբակցության ներկայացուցիչն ու նշել, որ փոփոխությունը հենց արվում է 170 մլն խորանարդ մետրից ավելի ջրառի հնարավորություն ունենալու համար: Գեղամ Նազարյանն էլ կարծիք է հայտնել, որ օրենքին անհամապատասխան առաջարկ է ներկայացվել եւ կոչ է արել մերժել: Զարուհի Բաթոյանը խոսել է Սեւանա լճի դեպքում ե՛ւ համալիր, ե՛ւ տարեկան ծրագրերի առկայության նպատակահարմարությունից: Արթուր Խաչատրյանի գնահատմամբ էլ հիմնավորումները հստակ չեն, տարեկան տեղումների, տարեկան միջին ջերմաստիճանի, մինչեւ ոռոգման սկիզբը ջրի բացթողնման եւ ոլորտային այլ խնդիրների մասով էական վիճակագրական տվյալներ չեն ներկայացվել: Արման Եղոյանին հետաքրքրել է, թե արդյո՞ք հնարավոր կլինի ջրամբարների կառուցման պարագայում Սեւանից ջրառի չափաքանակը հստակեցնել կամ դրա կարիքը չլինի:
«Հայաստան» խմբակցության տեսակետը ներկայացնելով՝ Արծվիկ Մինասյանը նշել է, որ խնդրի լուծումը Սեւանից լրացուցիչ ջրառը չէ: «Եթե 15 սմ հիմա արդեն պակաս է, նշանակում է՝ մենք արդեն շուրջ 200 մլն խորանարդ մետր ավելի պակաս ջուր ունենք Սեւանում, քան անցյալ տարի այս նույն ժամանակահատվածում: Հավելյալ բացթողելու արդյունքում բերելու եք Սեւանի էկոհամակարգի փլուզմանը: Մեր խմբակցությունը դեմ է քվեարկելու»,- ասել է խմբակցության քարտուղարը:
Եզրափակիչ ելույթում փոխնախարար Վաչե Տերտերյանը պարզաբանումներ է ներկայացրել մի շարք հարցերի վերաբերյալ: Փոխնախարարի խոսքով երկարաժամկետ տեսանկյունից խնդրի լուծումը պետք է լինի ջրի օգտագործման հայեցակարգային փոփոխությունը:
