ՀՀ Ոստիականությունը Երևանում հրեական սինագոգը հրդեհելու մասին ահազանգը ստացել է  նոյեմբերի 15-ին։ ՆԳՆ ոտիկանության լրատվության վարչության պետի տեղակալ Էդգար Ջանոյանը նշեց, որ  նոյեմբերի 15-ին՝ ժամը 18։30-ին,  ոստիկանությունում հրդեհի ահազանգով հաղորդում է ստացվել։

«Պարզվել է, որ ժամը 18։00-ին անհայտ անձը  Նար-Դոս  փողոցի 23  հասցեի շինության առաջին և երկրորդ  հարկի դռները փորձել է հրկիզել, որի հետևանքով դրանք վնասվել են։ Կազմված փաստաթղթերը փոխանցվել են քննչական բաժին», - ասաց նա։

Քննչական կոմիտեից ասացին, որ ՀՀ քրեական օրենսգրքի 264-րդ հոդվածի (Գույքը ոչնչացնելը կամ վնասելը) հատկանիշներով նախաձեռնվել է քրեական վարույթ։ Իրականացվում է նախաքննություն՝ հանգամանքները պարզելու համար, այս պահին դեպքի վայրում իրականացվում է զննություն, այլ քննչական, վարութային գործողություններ։