Հոկտեմբերի 4-ին Ադրբեջանի նախագահի հատուկ բանագնաց Խալաֆ Խալաֆովը Իրան կատարած այցի շրջանակներում հանդիպել է Իրանի նախագահ Սեյիդ Էբրահիմ Ռայիսիին, ազգային անվտանգության խորհրդի քարտուղար Ալի Աքբար Ահմադիանի և արտգործնախարար Հուսեյն Ամիր Աբդուլլահյանի հետ։
Ըստ ադրբեջանական լրատվամիջոցների՝
▪️ Հանդիպումների ընթացքում քննարկվել են ադրբեջանա-իրանական հարաբերությունների ներկա վիճակը, երկկողմ կապերի զարգացման և նոր փուլ անցնելու փոխադարձ քայլերը։
▪️ Քննարկվել է նաև Թեհրանում Ադրբեջանի դեսպանատան աշխատանքը վերսկսելու հարցը՝ հունվարի 27-ին դեսպանատան վրա հարձակում իրականացրած ահաբեկչին խստագույնս պատժելու համատեքստում։
▪️ Մտքեր են փոխանակվել երկկողմ հարաբերությունների զարգացմանը ծառայող կարևոր տրանսպորտային, կապի, տնտեսական և էներգետիկ նախագծերի շուրջ։ Երկու կողմերն էլ աջակցել են Հյուսիս-Հարավ տրանսպորտային միջանցքին, Իրանի տարածքով Ադրբեջանի արևելյան շրջանների և Նախիջևանի միջև կապի նոր հանգույցներ ստեղծելու, էներգետիկ նախագծերին, մասնավորապես՝ Խուդաֆերին և Գիզ Գալասի ամբարտակների շահագործմանը և այլ էներգետիկ նախագծերին։
▪️ Նշվել է, որ ադրբեջանա-իրանական բազմաբնույթ հարաբերությունները, այդ թվում՝ ռազմական և ռազմատեխնիկական համագործակցությունը, ծառայում են տարածաշրջանում խաղաղության, վստահության և զարգացման ապահովմանը։ Իրանական կողմը մտադրություն է հայտնել ընդլայնել և զարգացնել կապերը Ադրբեջանի հետ բոլոր ոլորտներում։
