Այդ հանդիպումից հրաժարվեց Ադրբեջանը։ Պարզ է, որ Ադրբեջանը չէր հրաժարվի մի հանդիպումից, որտեղ իր համար շատ բարենպաստ փաստաթուղթ պետք է ստորագրվեր, իսկ Հայաստանի համար՝ անբարենպաստ: Այս մասին այսօր խորհրդարանական ճեպազրույցների ժամանակ ասաց «Քաղաքացիական պայմանագիր» խմբակցության պատգամավոր Արման Եղոյանը՝ անդրադառնալով Գրանադայում սպասվող հանդիպումից ադրբեջանական կողմի հրաժարվելուն:
Նա նշեց, որ միշտ ռազմագերիների վերադարձի հարցը բարձրացվել է և նրանք, ովքեր վերադարձել են, դա տեղի է ունեցել բանակցությունների շնորհիվ:
«Քաղաքացիական պայմանագիր» խմբակցության քարտուղար Արթուր Հովհաննիսյանը նշեց, որ բանակցությունները երեք սկզբունքների հիման վրա պետք է լինեին:
«Սկզբուքներից մեկը փոխադարձաբար տարածքային ամբողջականության ճանաչմանն է վերաբերում՝ համապատասխանաբար 29 800 և 86 600 քմ տարածքով, երկրորդը՝ ենթակառուցվածքների ապաշրջափակմանը՝ իրավազորության, փոխադարձության և հավասարության սկզբունքների հիման վրա, երրորդ սկզբունքն այն է, որ դելիմիտացիան և դեմարկացիան պետք է տեղի ունենան Ալմաթիի հռչակագրի հիման վրա»,- ասաց նա:
Արթուր Հովհաննիսյանն ասաց, որ ՀՀ-ն օգտագործում է բոլոր դիվանագիտական խողովակները, արդյունավետ հարթակները՝ տարածաշրջանում խաղաղություն կառուցելու համար:
Նա նշեց, որ Լեռնային Ղարաբաղի իշխանությունները տեղյակ են եղել այն բոլոր գործընթացներից, որոնք տեղի են ունեցել: «Որևէ մեկի կամքին դեմ չեն գնացել, պարտադրանք չի եղել»,- ասաց նա:
Անդրադառնալով ՀՀ պաշտպանության նախկին նախարար, ԳՇ պետի նախկին տեղակալ Արշակ Կարապետյանի մեղադրանքներին՝ Արման Եղոյանը դրանք ցնդաբանություն համարեց: «ՀՀ սահմանները պաշտպանելու համար չի կարող որևէ մեկը պաշտոնանկ արվի, ՀՀ սահմանները պատշաճ պաշտպանելու համար մարդիկ ստանում են խրախուսում, կոչում, մեդալներ»,- ասաց նա:
