Սահմանադրական բարեփոխումների խորհրդի փոխնախագահ ընտրվեց ՄԻԵԴ-ում Հայաստանի ներկայացուցիչ, խորհրդի անդամ Եղիշե Կիրակոսյանը: Կիրակոսյանն ընտրվեց Սահմանադրական բարեփոխումների խորհրդի առաջին նիստում:
Կիրակոսյանի թեկնածությունն առաջարկեց խորհրդի կազմում ընդգրկված, «Հելսինկյան Քաղաքացիական Ասամբլեայի Վանաձորի գրասենյակ» ՀԿ նախագահ Արթուր Սաքունցը: Ըստ նրա՝ սահմանադրական բարեփոխումների խորհրդի, բարեփոխումների տրամաբանությունը պետք է լինի ապաքաղաքական, ոչ կուսակցական, հետևաբար լավ կլինի, որ փոխնախագահը լինի այն մարդը, որը կուսակցության հետ չի ասոցացվում:
Կիրակոսյանի թեկնածությունը սատարեց նաև խորհրդի անդամ, ՔՊ խմբակցության պատգամավոր Վլադիմիր Վարդանյանը:
Քվեարկությամբ նա ընտրվեց փոխնախագահ:
ՄԻԵԴ-ում Հայաստանի ներկայացուցիչ, Սահմանադրական բարեփոխումների խորհրդի անդամ Եղիշե Կիրակոսյանը սահմանադրական բարեփոխումների գործընթացի համար կարևորում է ճշգրիտ մեթոդաբանության ընտրությունը: Կիրակոսյանը նման տեսակետ հայտնեց Սահմանադրական բարեփոխումների խորհրդի առաջին նիստում իր խոսքում:
Եղիշե Կիրակոսյանը նախ վստահություն հայտնեց, որ խորհրդի աշխատանքը լինելու է արդյունավետ: Ըստ նրա՝ լավ է, որ նախորդ հանձնաժողովից անդամների ներկայացվածություն կա, քանի որ դա կօգնի որոշակի շարունակականություն ապահովել:
Կիրակոսյանն անդրադարձավ նաև նրան, թե ինքն ինչն է կարևորում սահմանադրական բարեփոխումների գործընթացում: «Կարծում եմ՝ սահմանադրական բարեփոխումները, լինելով բարդագույն իրավաքաղաքական պրոցես, առաջնային ամենակարևոր մոտեցումը պետք է լինի ճշգրիտ մեթոդաբանության ընտրությունը՝ սահմանադրական բարեփոխումների գործընթացը հաջողությամբ սկսելու, տանելու և ավարտին մոտեցնելու ուղղությամբ»,-ասաց Կիրակոսյանը՝ կարևորելով հրապարակայնությունը, կոմունիկացիաները:
Նա կարևորեց քննարկումների արդյունքում, փորձագիտական կարծիքների միջոցով տարբեր խնդիրների վերաբերյալ ճիշտ լուծումներ մոդելավորելը: Կիրակոսյանը համաձայնեց հնչած տեսակետի հետ, որ նաև Սահմանադրության տեքստի առումով որոշակի տեխնիկական խնդիրներ կան: «Բայց կարծում եմ՝ առաջնայինը պետք է կենտրոնանանք բովանդակությունը ճիշտ ձևակերպելու վրա: Եթե այս ուղղության վրա ունենանք ճիշտ մոտեցում, կարծում եմ՝ սկիզբն արդեն ճիշտ է դրված, վստահ եմ՝ կկարողանանք հաջողել»,-ասաց նա: