ՀՀ արդարադատության նախարար, Սահմանադրական բարեփոխումների խորհրդի նախագահ Կարեն Անդրեասյանը վստահեցնում է, որ խորհրդի առջև չկա դրված Սահմանադրությունն այս կամ այն կերպ ձևելու ոչ մի գաղտնի օրակարգ: Նպատակն է՝ Սահմանադրությունն աուդիտի ենթարկել, վերհանել խնդիրները, փոփոխություններ անել: Անդրեասյանն այս մասին վստահեցրեց Սահմանադրական բարեփոխումների խորհրդի առաջին նիստում բացման իր խոսքում:
Անդրեասյանը նախ տեղեկացրեց, որ ներկա չէ միայն ՄԻՊ-ը, որն ի սկզբանե համաձայնել էր լինել խորհրդի կազմում: «Ենթադրաբար զբաղվածության կամ այլ պատճառներով այսօր նա ներկա չէ: Հուսով եմ, որ մեր մյուս հանդիպումների ժամանակ արդեն կլինի նաև Մարդու իրավունքների պաշտպանը»,-ասաց նախարարը:
Ըստ նրա՝ ի պատասխան հրավերի՝ խորհրդարանական երկու ընդդիմադիր խմբակցությունները ևս ցանկություն չեն հայտնել մասնակցել գործընթացին: «Մենք այս գործընթացը սկսել ենք դեռևս ամիսներ առաջ, և առաջին իսկ փուլերից փորձել ենք նաև ներգրավել խորհրդարանական ընդդիմությանը, սակայն իրենք որպես քաղաքական որոշում, չեն մասնակցում»,-ասաց Անդրեասյանը:
Նա վստահեցրեց, որ կառավարությունը շատ կարևորում է նաև նիստին ներկա չգտնվող արտախորհրդարանական մյուս կուսակցությունների հետ աշխատանքները, գործընթացով հետաքրքրված բոլոր հասարակական կազմակերպությունների դերը, լսելու են նաև նրանց կարծիքները:
«Մեզ համար, որպես կառավարություն, կառավարության ներկայացուցիչ, շատ կարևոր է, որ գործընթացները լինեն ծայրահեղ թափանցիկ, և սա չլինի մի գործընթաց, որտեղ փակ դռների հետևում գիտնականներ կամ քաղաքական շահեր, հետաքրքրություններ ունեցող մարդիկ կհավաքվեն և կունենան ուղղակի փաստաթուղթ, որը հետո մի կերպ համոզելով կներկայացվի ժողովրդին: Կարծում եմ՝ գործընթացը պետք է պահենք հնարավորինս մասնակցային»,-ասաց նախարարը:
Նա որպես կառավարության ներկայացուցիչ հատուկ հայտարարեց. «Չկա որևէ գաղտնի օրակարգ, որը դրված է իմ կամ այս խորհրդի, կամ այս խորհրդի որևէ անդամի առջև, թե իբր սա արվում է, որ այսպես կամ այնպես ձևվվի Սահմանադրությունը. նման օրակարգեր չկան»:
Նախարարը մեջբերեց վարչապետի խոսքը, որ սա բաց գործընթաց է, որտեղ առաջնային նպատակը Սահմանադրությունը աուդիտի ենթարկելն է, և այդ աուդիտի արդյունքում վերհանել խնդիրներ, որոնք բաց, մասնակցային ձևով, մասնագետներին լսելով, կփոփոխվեն, որ ժողովրդավարությունը ավելի լավ զարգացում ապրի, խնդիրները կարգավորվեն:
