Իրանի արտաքին գործերի նախարար Զարիֆը ափսոսանք է հայտնել ԶԼՄ-ներում իրանցի տնտեսագետ Սաիդ Լիլյազի հետ իր զրույցի ձայնագրության արտահոսքի վերաբերյալ՝ ասելով, որ դրա հրապարակումը վերածվել է ներքին բախման:
Կիրակի ԶԼՄ-ները հրապարակել էին մարտին Լիլյազի հետ Զարիֆի զրույցի ձայնագրությունից մի հատված: Այդ երկխոսության ընթացքում իրանցի նախարարն ասել է, որ գեներալ Քասեմ Սոլեյմանին, որը մեկ տարի առաջ զոհվեց Իրաքում ԱՄՆ ավիահարվածի արդյունքում, կարևոր դեր է խաղացել Թեհրանի արտաքին քաղաքականության և Մոսկվայի հետ բանակցություններում: Զարիֆն ասել է նաև, որ ԱՄՆ գործող պետքարտուղարն իրեն հայտնել է Սիրիայի տարածքում Իրանի հետ կապված թիրախների վրա Իսրայելի մոտ 200 հարձակման մասին:
Իրանի արտգործնախարարն ափսոսանք է հայտնել, որ դիվանագիտության և ռազմական ոլորտներին վերաբերող գաղտնի քննարկումը վերածվում է ներքին վեճի:
Իրանի խորհրդարանի ազգային անվտանգության և արտաքին քաղաքականության հանձնաժողովը երկրի արտգործնախարարին հրավիրել է խորհրդարան՝ քննարկելու իրանցի տնտեսագետ Սաիդ Լիլյազի հետ նրա զրույցն ու դրա ձայնագրության արտահոսքը, հաղորդում է Tasnim-ը:
Տնտեսագետ Լիլյազը քննադատել է խոսակցության արտահոսքը և հույս հայտնել, որ երկրի անվտանգության ծառայությունը կբացահայտի դրա հեղինակին:
