ՀՀ ազգային ժողովի «Հայաստան» խմբակցության պատգամավոր Վահե Հակոբյանը Բաքվի ներկայացրած՝ հարաբերությունների կարգավորման վերաբերյալ 5 կետից բաղկացած փաստաթուղթը համարում է Ադրբեջանի միակողմանի շահերն ու նպատակներն ամփոփող պահանջներ: Նա նման կարծիք հայտնեց «Ազգային ժողովի կանոնակարգ» սահմանադրական օրենքում լրացում կատարելու մասին օրենքի նախագծի վերաբերյալ կազմակերպված խորհրդարանական լսումներում:
Անդրադառնալով Ադրբեջանի ներկայացրած 5 առաջարկներին՝ նա ասաց. « Դրանք ոչ թե առաջարկներ են, այլ Ադրբեջանի միակողմանի շահերն ու նպատակներն ամփոփող պահանջներ»:
Նա հարց բարձրացրեց՝ ո՞րն է Հայաստանի պատասխանը, ի՞նչ կետեր է ՀՀ-ն այդ պատասխանի մեջ դրել սեղանին:
«Ադրբեջանն այս առաջարկով փորձում է մեկընդմիշտ փակել հակամարտության էջը և զրկել Հայաստանին թե ներկայում, թե ապագայում Արցախի ինքնորոշման իրավունքի հարցը բարձրացնելու, Արցախի շահերն ու իրավունքներն առաջ մղելու հնարավորությունից»,-ասաց պատգամավորը:
Ի պատասխան Ադրբեջանի այդ առաջարկների՝ Հայաստանի՝ ԵԱՀԿ Մինսկի խմբի շրջանակներում գործընթաց սկսելու առաջարկը պատգամավորը համարեց անհասկանալի: Հակոբյանը հարցրեց՝ սա՞ է մեր առաջարկը: «Ինչո՞ւ չկա մեր շահերն արտահայտող սեփական օրակարգ, կամ, եթե կա այդ առաջարկը, որտե՞ղ է այն»,-հարցրեց Հակոբյանը:
Անդրադառնալով «Պատիվ ունեմ»-ի առաջարկած նախագծին, որով առաջարկում են, որ ԱԳ նախարարն ու վարչապետը զեկույցներ ներկայացնեն ԱԺ-ին, պատգամավորն ասաց, որ նախագիծն, իհարկե, չի լուծում և չի կարող լուծել բոլոր առկա խնդիրները, բայց առնվազն այս նախագիծն ընդունելու պարագայում հնարավորություն ենք ստանալու մեծացնել գործադիր իշխանության նկատմամբ օրենսդիր իշխանության վերահսկողության լծակները:
Մարտի 11-ին Ադրբեջանի արտգործնախարար Ջեյհուն Բայրամովը հայտարարել էր, որ Բաքուն Երևանին է ուղարկել հարաբերությունների կարգավորման վերաբերյալ 5 կետից բաղկացած փաստաթուղթ և սպասում է պատասխանի: Մարտի 14-ին Ադրբեջանի արտաքին գործերի նախարարությունը հանրայնացրել էր ուղարկված 5 կետերի բովանդակությունը՝ նշելով, թե Բաքուն պատրաստ է խաղաղության պայմանագրի շուրջ Երևանի հետ բանակցությունների այն պայմանով, որ Հայաստանը կընդունի այդ «հինգ հիմնարար սկզբունքները»:
Ըստ Ադրբեջանի ԱԳՆ մամուլի խոսնակ Լեյլա Աբդուլաևայի, հինգ կետից բաղկացած փաստաթղթի նախագծում հետևյալ դրույթներն են.
- Միմյանց ինքնիշխանության, տարածքային ամբողջականության, սահմանների անքակտելիության և միմյանցից քաղաքական անկախության փոխադարձ ճանաչում,
- Փոխադարձ հաստատում միմյանց նկատմամբ տարածքային հավակնություններից և իրավական պարտավորություն ապագայում ևս նման ոտնձգություններից հրաժարվելու մասին,
- Կողմերը պարտավորվում են ձեռնպահ մնալ միջպետական հարաբերություններում միմյանց անվտանգությանը սպառնալուց, քաղաքական անկախության և տարածքային ամբողջականության դեմ սպառնալիքներ և ուժ կիրառելուց, ինչպես նաև այլ հանգամանքներից, որոնք հակասում են ՄԱԿ-ի կանոնադրությանը,
- Պետական սահմանի սահմանազատում և սահմանագծում և դիվանագիտական հարաբերությունների հաստատում,
- Տրանսպորտային ուղիները և հաղորդակցությունների բացում, փոխադարձ հետաքրքրություն ներկայացնող այլ ոլորտներում այլ համապատասխան հաղորդակցությունների և համագործակցության հաստատում:
Հայաստանի Հանրապետությունը պատասխանել է Ադրբեջանի Հանրապետության կողմից փոխանցված առաջարկներին և ՄԱԿ կանոնադրության, Քաղաքական և քաղաքացիական իրավունքների միջազգային դաշնագրի և Հելսինկիի Եզրափակիչ ակտի հիման վրա Հայաստանի Հանրապետության և Ադրբեջանի Հանրապետության միջև խաղաղության պայմանագրի կնքման նպատակով բանակցություններ կազմակերպելու համար դիմել է ԵԱՀԿ ՄԽ համանախագահությանը:
Բացի այդ, ՀՀ ԱԳ նախարար Արարատ Միրզոյանը «Արմենպրես»-ին տված հարցազրույցում, անդրադառնալով 5 կետերին՝ խաղաղության պայմանագրի շուրջ բանակցություններ սկսելու վերաբերյալ, ընդգծել էր, որ խաղաղության պայմանագրի շուրջ բանակցությունները պիտի ընթանան առանց նախապայմանների: