Ասուլիսներ, հանրահավաքներ և քայլերթներ իրականացնելով քաղաքական ուժերը կշարունակեն արտահերթ խորհրդարանական ընտրությունների նախընտրական քարոզարշավները։ Ընտրություններին մասնակցում է 25 քաղաքական ուժ՝ 21 կուսակցություն և 4 դաշինք: Ընտրություններն անց են կացվելու հունիսի 20-ին:
«Ինքնիշխան Հայաստան» կուսակցությունը՝ Դավիթ Սանասարյանի գլխավորությամբ քարոզարշավն իրականացնել է Գեղարքունիքի մարզում։ Կուսակցության անդամները ժամը 10։00-ից եղել են Գավառում, այնուհետև շարժվել դեպի Մարտունի, Վարդենիս, Ճամբարակ։
«Քաղաքացիական պայմանագիր» կուսակցությունը՝ Նիկոլ Փաշինյանի գլխավորությամբ, քարոզարշավն իրականացնել է Կոտայքի մարզում։ Հանդիպումները սկսեել 10։30-ին Եղվարդ քաղաքից։ Եղել են նաև Նոր Գեղիում, Նոր Հաճնում, Աբովյանում, Բյուրեղավանում, Չարենցավանում, ապա Հրազդանում, որտեղ հանրահավաք տեղի ունենացավ ժամը 18։00-ին։ Ժամը 19։30-ին Նիկոլ Փաշինյանի գլխավորությամբ՝ Շենգավիթ վարչական շրջանում տեղի ունեցավ իրազեկման երթ, մեկնարկը տրվեց Գարեգին Նժդեհի հրապարակից։
«Ազատ հայրենիք» դաշինքը հունիսի 13-ին եղել է Սյունիքի մարզում։ Ընտրողների հետ հանդիպումներ են անցկացվել Կապան, Գորիս և Սիսիան քաղաքներում։
«Հայաստան» դաշինքը՝ ՀՀ երկրորդ նախագահ Ռոբերտ Քոչարյանի գլխավորությամբ և մյուս առաջնորդների մասնակցությամբ եղել է Տավուշի մարզում։ Ժամը 10։50-ից սկսած հանդիպումներ են կայացել Նոյեմբերյանում, Բերդում, Իջևանում, ինչպես նաև Դիլիջանում։
«Պատիվ ունեմ» դաշինքը նախընտրական քարոզարշավի 7-րդ օրը հանդես եկավ ասուլիսով։ Դաշինքի կենտրոնակայանում տեղի ունեցավ պատգամավորի թեկնածու, ՀՀԿ Երիտասարդական կազմակերպության նախագահ Հայկ Մամիջանյանի մամուլի ասուլիսը։
«Բարգավաճ Հայաստան» կուսակցությունը քարոզարշավի 7-րդ օրը եղան Սյունիքի մարզում։ Ժամը 16։30-ին քաղաքական ուժի ներկայացուցիչները այցելեցին Կապան։
«Հայ ազգային կոնգրես» կուսակցության ներկայացուցիչները եղան Լոռու մարզում։ Նրանք հանդիպեցին ընտրողների հետ, ներկայացրեցին կուսակցության ծրագիրն ու ապագայի տեսլականը: 11։30-ին այցելեցին Ջրաշեն գյուղ, իսկ 13։00-ին՝ Վանաձոր։
«Զարթոնք» ազգային քրիստոնեական կուսակցության թեկնածուները հունիսի 13-ին, առավոտյան կլինեն Երևան քաղաքում՝ Ավան վարչական շրջանում։
«Արդար Հայաստան» կուսակցության նախագահ Նորայր Նորիկյանը նախընտրական քարոզարշավի 7-րդ օրը ժամը 15։00-ին կլինի Ազատության հրապարակում, որտեղ ԶԼՄ ներկայացուցիչների հետ կամփոփի քարոզարշավի առաջին 6 օրը։ Այնուհետև նույն օրը, ժամը 16։00-ին կուսակցության անդամները կլինեն Մասիս քաղաքում, ապա Արտաշատում, Արարատում և Վեդիում։
«Մեր տունը Հայաստանն է» կուսակցությունը քարոզարշավը կմեկնարկի Արարատի մարզում։ Ներկայացուցիչները հավաք են նախաձեռնել Արտաշատ քաղաքի թատրոնամերձ հրապարակում։
Քարոզարշավը կտևի մինչև հունիսի 18-ը ժամը 24:00-ն: Էլեկտրոնային եղանակով քվեարկությունը մեկնարկել է հունիսի 11-ին ժամը 08:00-ին և կտևի մինչև հունիսի 13-ը ժամը 20:00-ն:
Ընտրողներն ընտրատեղամասում ստանալու են մասնակցող քաղաքական ուժերի թվին համապատասխան քվեաթերթիկներ, ընտրելու են դրանցից միայն մեկը, դնելու են ծրարի մեջ ու գցելու քվեատուփը: Ընտրողները քվեաթերթիկի վրա գրիչով որևէ նշում չեն կատարելու:
