ՀՀ նախագահի թեկնածու Վահագն Խաչատուրյանը Կառավարության նիստից հետո լրագրողների հետ ճեպազրույցում անդրադարձավ դեսպաններ նշանակելու քաղաքականության վերաբերյալ հարցին ու շեշտեց, որ երկար տարիների փորձառությունը դեռ չի նշանակում, որ անձը տվյալ պետության շահերն է սպասարկում:
«Տարիների փորձառություն ունեցող շատ դեսպաններ, պարզվեց, ոչ թե զբաղվում են պետական շահերը սպասարկելով, այլ ուրիշ խնդիրներ են լուծում: Ինձ համար որպես չափանիշ կարող են լինել այն մարդիկ, ովքեր, ծառայելով որևէ երկրում, հետո այդտեղ մնում են որպես քաղաքացի և չեն վերադառնում: Այն ինստիտուտը, որը կոչվում է դիվանագիտական ծառայություն, այնտեղ կան և՛ քաղաքական նշանակումներ, և՛ դիվանագիտական նշանակումներ»,- ասաց Խաչատուրյանը:
Անդրադառնալով ԱՄՆ-ում ՀՀ դեսպան Լիլիթ Մակունցի օրինակին՝ Խաչատուրյանը նշեց՝ շատ ճիշտ նշանակում էր:
«Նա քաղաքական թիմի անդամ է, որը պատասխանատվություն է զգում երկրի քաղաքական գծի համար: Նա ԱՄՆ-ում ներկայացնում է ՀՀ շահերը ճիշտ այնպես, ինչպես այստեղ կա, խնդիրը, որ դրված է: Նա չի գնա, ասի՝ ես Լիլիթ Մակունցն եմ, այս հարցի վերաբերյալ Նիկոլ Փաշինյանն այսպես ասաց, բայց ես այսպես եմ մտածում»,- ասաց Խաչատուրյանը:
