Ուկրաինայի նախագահ Վլադիմիր Զելենսկին հայտարարել է, որ Մեծ Բրիտանիայի, Լեհաստանի և Ուկրաինայի համագործակցությունը նոր ձևաչափ է ստանում:
«Մենք Եվրոպայում քաղաքական համագործակցության նոր ձևաչափ ենք ստեղծում Ուկրաինայի, Մեծ Բրիտանիայի և Լեհաստանի միջև»,- ասել է նա՝ երեքշաբթի օրը ելույթ ունենալով Գերագույն Ռադայի հերթական նստաշրջանի բացման ժամանակ։
Ենթադրվում է, որ համապատասխան պայմանավորվածությունները կյանքի կկոչվեն այսօր՝ Մեծ Բրիտանիայի և Լեհաստանի վարչապետներ Բորիս Ջոնսոնի և Մատեուշ Մորավիեցկու Կիև այցի ընթացքում:
Զելենսկին նաև ասել է, որ Ուկրաինային դիվանագիտական աջակցությունն ամենաբարձր մակարդակի վրա է 2014 թվականից ի վեր։ Միաժամանակ նա հավելել է, որ իր երկիրը «գնահատում է բոլորի աջակցությունը, բայց հույսը դնում է միայն իր վրա»։
Ավելի վաղ ԶԼՄ-ները հայտնել էին երեք երկրների միջև փոխգործակցության նոր ձևաչափի ստեղծման մասին՝ վկայակոչելով դիվանագիտական աղբյուրներ, չհստակեցնելով մանրամասներ։ Այս ձեւաչափի մասին առաջին անգամ նշել է Մեծ Բրիտանիայի արտգործնախարար Լիզ Թրասը՝ հունվարի 21-ին ելույթ ունենալով Ավստրալիայում։ Նրա խոսքերով, 2021 թվականի դեկտեմբերին Զելենսկու Լոնդոն կատարած այցի ընթացքում քննարկվել է Մեծ Բրիտանիայի, Լեհաստանի և Ուկրաինայի համագործակցությունը։