ԱԺ «Իմ քայլը» խմբակցությունից դուրս եկած պատգամավորներ՝ Սոֆիա Հովսեփյանը, Թագուհի Թովմասյանը եւ Գոռ Գեւորգյանը շրջանառության մեջ են դրել «Ազգային ժողովի կանոնակարգ» սահմանադրական օրենքում փոփոխություն եւ լրացում կատարելու մասին նախագիծը:
Նախագծով առաջարկվում է՝ Կառավարության անդամների համար սահմանել պարտադիր պահանջ ԱԺ-Կառավարություն հարցուպատասխանի ժամանակ ԱԺ ամբիոնին մոտենալու եւ պատգամավորների հարցերին բանավոր պատասխանելու: Իսկ, եթե բանավոր պատասխանել հնարավոր չէ, ապա նրանք պետք է բանավոր հիմնավորում ներկայացնեն պատգամավորների հարցերին բանավոր չպատասխանելու պատճառների մասին:
ԱԺ յուրաքանչյուր հերթական նիստերի չորեքշաբթի օրվա վերջին հիմնական նիստում Կառավարության անդամները պատասխանում են պատգամավորների բանավոր հարցերին: Նախագծի հեղինակները նշում են, որ գործնականում Կառավարության անդամները, գտնվելով ԱԺ նիստերի դահլիճում, երբեմն բանավոր չեն պատասխանում պատգամավորների բանավոր հարցերին՝ փոխարենը նիստը վարողի միջոցով առաջարկում են հարցը ներկայացնել գրավոր: Ընդ որում, ըստ նրանց, Կառավարության անդամները շատ հաճախ նույնիսկ չեն ներկայացնում հիմնավորում՝ պատգամավորների ներկայացրած բանավոր հարցերին բանավոր չպատասխանելու պատճառների վերաբերյալ:
Պատգամավորներն ակնկալում են, որ նախագծի ընդունման արդյունքում կմեծացվի խորհրդարանական վերահսկողության իրականացման արդյունավետությունը:
Նշենք, որ վերոնշյալ պատգամավորները դուրս են եկել «Իմ քայլը» խմբակցությունից եւ ԱԺ-Կառավարություն հարցուպատասխանների ժամանակ շատ հաճախ նրանց հարցերին բանավոր պատասխան չի տրվում:
