Վայոց ձորի նախկին մարզպետ, Սահմանադրական դատարանի աշխատակազմի նախկին ղեկավար Էդգար Ղազարյանի նախաձեռնությամբ ժամը 17:00-ին Հանրապետության հրապարակում տեղի ունեցավ հանրահավաք: Էդգար Ղազարյանը դեռևս օգոստոսի 10-ին հայտարարել էր «Անկախության շարժում» նախաձեռնության ստեղծման մասին և օգոստոսի 23-ին քաղաքացիներին հրավիրել հանրահավաքի:
Հանրահավաքից առաջ լրագրողների հետ ճեպազրույցում Էդգար Ղազարյանը հայտնեց, որ մտադիր է դիմել ՀՀ վարչապետ Նիկոլ Փաշինյանի աշխատակազմին Կառավարության ղեկավարի հետ հանդիպում կազմակերպելու առաջարկով։
Էդգար Ղազարյանը հանրահավաքի ժամանակ ներկայացրեց այն բոլոր ճանապարհները, որով, ըստ իրեն, հնարավոր է հասնել վարչապետ Նիկոլ Փաշինյանի հրաժարականին:
Հանրահավաքի կազմակերպիչը հավաքված մի խումբ քաղաքացիներին ասաց, որ իրենից պետք չէ ակնկալել ուժի գործողություն, ինքը չի պատրաստվում շենքեր գրոհել:
Հանրահավաքի ընթացքում Էդգար Ղազարյանը փորձեց հանդիպել վարչապետ Նիկոլ Փաշինյանի հետ, սակայն դա նրան չհաջողվեց, քանի որ ոստիկանության աշխատակիցները տեղեկացրել էին, որ աշխատանքային ժամն ավարտվել է և չկա որևէ պատասխանատու անձ, որը կարող է ընդունելություն կազմակերպել կամ պատասխանել հարցերին։ Ելույթի վերջում Ղազարյանն հայտնեց, որ հաջորդ հանրահավաքը տեղի կունենա Ազգային ժողովում, երբ տեղի ունենա նոր վարչապետի ընտրությունը:
«Իրազեկ քաղաքացիների միավորումն» աերոնկարահանման միջոցով իրականացրել է հանրահավաքի մասնակիցների հաշվարկ, որի արդյունքում պարզվել է, որ 19։17-ի դրությամբ Հանրապետության հրապարակի՝ հանրահավաքի իրականացման հատվածում գտնվել է շուրջ 2450 մարդ: Հաշվարկն իրականացվել է մասնակիցների անհատական հաշվարկի միջոցով։
