Եվրամիությունը (ԵՄ) ի գիտություն է ընդունել Ղազախստանի նախագահ Կասիմ-Ժոմարտ Տոկաևի՝ ՀԱՊԿ-ից ռազմական օգնություն խնդրելու որոշումը և խաղաղապահ ուժերին կոչ է արել «պահպանել Ղազախստանի ինքնիշխանությունն ու անկախությունը»։ Այս մասին հինգշաբթի օրը Բրյուսելում կայացած ճեպազրույցում հայտարարել է ԵՄ արտաքին գործերի և անվտանգության քաղաքականության հարցերով խոսնակ Նաբիլա Մասրալին։
«Մենք ի գիտություն ենք ընդունել նախագահ Տոկաեւի որոշումը՝ օգնության համար դիմել ՀԱՊԿ-ին։ Անկասկած, մենք ՀԱՊԿ ուժերից ակնկալում ենք պահպանել Ղազախստանի ինքնիշխանությունն ու անկախությունը», – ասել է Մասրալին։
Նա նաև կրկնել է Ղազախստանի վերաբերյալ ԵՄ արտաքին քաղաքականության ծառայության ավելի վաղ արված հայտարարությունը ՝ ընդգծելով, որ ԵՄ-ն «դատապարտում է բռնության և վանդալիզմի գործողությունները», Ղազախստանում բոլոր կողմերին զսպվածության կոչ է անում և պատրաստ է աջակցել Ղազախստանում երկխոսության գործընթացին»:
