Այսօր՝ օգոստոսի 12-ին, Ազգային ժողովում շարունակում է քննարկվել ԱԺ մշտական հանձնաժողովների նախագահների ընտրության հարցը:
«Պատիվ ունեմ» խմբակցության կողմից ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահի թեկնածու է առաջադրվել Թագուհի Թովմասյանը:
Ինչպես նշեց ԱԺ փոխնախագահ Ռուբեն Ռուբինյանը, ՔՊ խմբակցության և նախկինում էլ «Իմ քայլի» պատգամավորները ընդհանուր առմամբ կրում են քաղաքական պատասխանատվություն իշխանության և վատ, և լավ արդյունքների համար:
Դիմելով թեկնածուին՝ ԱԺ փոխնախագահը հարցրեց. «Դուք մինչև 2020 թվականի նոյեմբերը եղել եք իշխող խմբակցության անդամ: Դուք կրո՞ւմ եք քաղաքական պատասխանատվություն ձեր իշխող խմբակցության անդամ եղած ժամանակաշրջանի համար՝ իր բոլոր արդյունքներով հանդերձ»:
Ի պատասխան Թագուհի Թովմասյանը նշեց, որ ինքը չի կարող պատասխանատվություն կրել մի բանի համար, որից տեղյակ չի եղել, ինչին արձագանքելով՝ Ռուբեն Ռուբինյանը հարցրեց. «Իսկ «Պատիվ ունեմ» խմբակցության ամբողջ գործունեությունից տեղյա՞կ եք»:
