«Լուսավոր Հայաստան» խմբակցությունն այսօր Ազգային ժողովում պատրաստվում է բարձրացնել ՀՀ կրթության, գիտության, մշակույթի եւ սպորտի նախարար Արայիկ Հարությունյանի հրաժարականի հարցը: ԼՀԿ-ական պատգամավոր Անի Սամսոնյանն այսօր այդ առիթով որոշել է ԱԺ բերել պաստառ, ինչը նրան թույլ չեն տվել: Անի Սամսոնյանն ԱԺ նախագահ Արարատ Միրզոյանին կոչ արեց՝ հրահանգել, որ աշխատակազմը թողնի իր հետ նիստերի դահլիճ մտցնել պաստառ:
InterLur.com լրատվական գործակալության հաղորդմամբ՝ Սամսոնյանը հիշեցրեց, որ Արարատ Միրզոյանը նախորդ գումարման ԱԺ-ում կարողացել է իր հետ ԱԺ նիստերի դահլիճ բերել գունավոր հրավառ նյութ.
«Որպես Ազգային ժողովի «Ելք» խմբակցության պատգամավոր՝ Դուք հնարավորություն եք ունեցել այս դահլիճ բերել հրավառ նյութեր և իրականացնել ակցիա: Հիմա խնդրում եմ բացատրել, թե ինչո՞վ ես կարող եմ խանգարել, եթե իմ անմեղ պաստառը, որը ո՛չ հրավառ նյութ է, ո՛չ ծակող գործիք, ո՛չ որևէ մեկին կարող է վնաս պատճառել, չի կարող մտնել այս Ազգային ժողովի դահլիճ, և ես կարողանամ այն ինձ մոտ փակցնել: Խնդրում եմ՝ որպես ԱԺ նախագահ՝ հրահանգել Ձեր աշխատակազմին, որ ես կարողանամ պաստառը մտցնել ներս, հակառակ դեպքում ինձ մոտ տպավորություն է ստեղծվում, որ Դուք այստեղ փորձում եք բոլոր ձեւերով խեղդել մեր բոլոր ակցիաները»,-ասաց Սամսոնյանը։
Արարատ Միրզոյանը արձագանքեց՝ ոչ ոքի չի պատրաստվում խեղդել․
«Հարգելի՛ տիկին Սամսոնյան, ես ոչ մեկին չեմ պատրաստվում խեղդել, Աստծո սիրուն: Ինչ ակցիա ուզում եք արեք, ես չգիտեմ՝ ինչի մասին է խոսքը: Կհասկանանք՝ ինչի մասին է խոսքը: Ինչ վերաբերում է ֆայերները ներս բերելու դեպքին, անկեղծ ասած՝ մենք հեղափոխություն էինք անում, այդպես ստացվեց»։
Ինչպես հայտնում է Freenews-ը Անի Սամսոնյանի պաստառի մի կողմում պատկերված էր ԿԳՄՍ նախարար Արայիկ Հարությունյանի նկարը, իսկ մյուս կողմում գրված էր «Քայլ արա, դուխով հեռացիր» գրառումը: Հիշեցնենք, որ «Լուսավոր Հայաստան» խմբակցությունը, ավելի վաղ հայտարարվել էր, այսօր ԱԺ-ում բարձրացնելու է ՀՀ կրթության, գիտության, մշակույթի և սպորտի նախարար Արայիկ Հարությունյանի հարաժարականի պահանջը: Դրան զուգահեռ ԱԺ-ի դիմաց ԼՀԿ-ն հրավիրել է ցանկացողներին ՝ մասնակցելու նույն պահանջով բողոքի ակցիայի:
