ՀՀ վարչապետի պաշտոնակատար Նիկոլ Փաշինյանը հայտարարել է, որ Լեռնային Ղարաբաղում ռուս խաղաղապահների գործունեությունն արդյունավետ է գնահատում՝ փոխանցում է РИА Новости-ն:
«Ցանկանում եմ հատկապես նշել այն դերը, որ Ռուսաստանն ու նախագահ Վլադիմիր Պուտինը խաղացել են Լեռնային Ղարաբաղի պատերազմի դադարեցման գործում: Ցանկանում եմ ընդգծել, որ Լեռնային Ղարաբաղում ռուս խաղաղապահների գործունեությունն արդյունավետ եմ գնահատում. դա այժմ ակնհայտ է մեզ համար»,- հայտարարել է Նիկոլ Փաշինյանը ՌԴ վարչապետի հետ հանդիպման ժամանակ:
Նա հիշեցրել է, որ շարունակվում է ՌԴ-ի, Հայաստանի և Ադրբեջանի փոխվարչապետների նախագահությամբ գործող եռակողմ հանձնաժողովի աշխատանքը:
«Սակայն կուզեի նշել, որ Ադրբեջանը մինչև այժմ, դժբախտաբար, չի կատարել նոյեմբերի 9-ի եռակողմ հայտարարության ամենակարևոր դրույթը: Դա վերաբերում է ռազմագերիների և պահվող այլ անձանց վերադարձին»,- ասել է Նիկոլ Փաշինյանը:
ՀՀ վարչապետի պաշտոնակատար Նիկոլ Փաշինյանը Ռուսաստանին շնորհակալություն է հայտնել «այդ խնդիրը լուծելու ուղղությամբ գործադրվող ջանքերի համար»:
ՌԴ վարչապետ Միխայիլ Միշուստինը ՀՀ վարչապետի պաշտոնակատար Նիկոլ Փաշինյանին է փոխանցել ՌԴ նախագահ Վլադիմիր Պուտինի ողջույնները և նշել, որ Ռուսաստանը բարձր է գնահատում եղբայրական Հայաստանի հետ հարաբերությունները, որոնք բազմամյա դաշնակցային ու ռազմավարական բնույթ են կրում՝ փոխանցում է РИА Новости-ն:
«Նախևառաջ ցանկանում եմ փոխանցել ՌԴ նախագահ Վլադիմիր Պուտինի ջերմ ողջույնները և լավագույն մաղթանքները»,- ասել է ՌԴ վարչապետը Նիկոլ Փաշինյանի հետ հանդիպման ժամանակ:
Նա ընդգծել է, որ Մոսկվան բարձր է գնահատում Երևանի հետ եղբայրական հարաբերությունները. դրանք բազմամյա դաշնակցային ու ռազմավարական բնույթ են կրում:
ՌԴ վարչապետը նշել է, որ Լեռնային Ղարաբաղում ռազմական գործողությունների ավարտից հետո ՌԴ-ի, Հայաստանի ու Ադրբեջանի ղեկավարների կողմից ընդունված հայտարարությունը համատեղ աշխատանքի լայն հնարավորություններ է ստեղծել:
«Դրանք առաջին հերթին տնտեսական ու տրանսպորտային բոլոր կապերի ապաշրջափակումն ու ենթակառուցվածքային նոր երթուղիների ստեղծումն են: Այս ամենը Անդրկովկասյան տարածաշրջանի կայուն զարգացման համար պայմաններ կստեղծի»,- նշել է Միշուստինը:
