«3+3» տարածաշրջանային խորհրդատվական հարթակի առաջին հանդիպումից ՀՀ վարչապետ Նիկոլ Փաշինյանի տպավորությունն ընդհանուր առմամբ դրական է եղել: Այդ մասին առցանց ասուլիսի ընթացքում հայտնեց վարչապետը՝ պատասխանելով «3+2» ձևաչափով հանդիպման արդյունքների մասին հարցին:
«Դա եղել է առաջին հիմնադիր հանդիպումը, և շատ ընդհանուր սկզբունքներ են քննարկվել՝ տեխնիկական, կազմակերպչական, ինչ պարբերականությամբ հանդիպում է լինելու, այդ հանդիպումները ինչպես կազմակերպել, հարցերի ինչ շրջանակ քննարկել: Եվ այն, ինչ նախկինում հայտարարել ենք, այդ շրջանակում է եղել: Անկեղծ ասած, մեր ներկայացուցիչը ինչ մեզ զեկուցել է, ընդհանուր առմամբ, դրական տպավորություններ ունենք առաջին հանդիպումից, որը չի նշանակում, թե այն ահազանգերը, այն ռիսկերը, որոնց մասին բարձրաձայնում են, չկան»,- ասաց Փաշինյանը:
«Եթե մենք հիմա բանակցում ենք Ադրբեջանի հետ, եթե երկկողմ ձևաչափով բանակցելու ենք Թուրքիայի հետ, եթե Իրանի հետ մեր երկխոսությունը մշտական է, Ռուսաստանը մեր ռազմավարական գործընկերն է, եթե առանձին-առանձին բոլորի հետ խոսում ենք, անտրամաբանական կլինի, եթե ասենք, որ այդ միջավայրում չենք ուզում խոսել»,- ասաց Փաշինյանը:
Ինչ վերաբերում է հայկական կողմի այն նախապայմանին, որ չեն քննարկվելու այնպիսի հարցեր, որոնք այլ ձևաչափերում քննարկվում են, ապա, վարչապետի խոսքով, ըմբռնումը կա, որովհետև ոչ ոք չի ուզում՝ այդ քննարկումը ձախողվի:
«Անտրամաբանական կլինի, եթե մենք հավաքվենք և տանենք այն ուղղությամբ, որ խոսակցությունը ձախողվի: Այդ ըմբռնումը կա, ինչը չի նշանակում, որ հաջորդ պահին հանկարծ փորձ չի արվի ձախողել»,- նշեց վարչապետը:
Հիշեցնենք, որ դեկտեմբերի 10-ին Մոսկվայում տեղի է ունեցել «3+3» տարածաշրջանային խորհրդատվական հարթակի առաջին հանդիպումը՝ Ռուսաստանի, Հայաստանի, Ադրբեջանի, Թուրքիայի փոխարտգործնախարարներ Անդրեյ Ռուդենկոյի, Վահե Գևորգյանի, Խալաֆ Խալաֆովի, Սեդաթ Օնալի, ինչպես նաև Իրանի արտգործնախարարության գլխավոր տնօրեն Ալիռեզա Հաղիղյանի մասնակցությամբ: Վրաստանի ներկայացուցիչները, որոնք նույնպես հրավիրված էին, ձեռնպահ են մնացել հանդիպմանը մասնակցելուց։