Հուլիսի 6-7-ը կայացած «Նիդերլանդական-հայկական գործարար օրեր 2022» երկօրյա միջոցառման ընթացքում քննարկվեցին հայ-նիդերլանդական գործարար շրջանակններում փոխշահավետ համագործակցության հնարավորությունները՝ հատկապես ՏՏ և գյուղատնտեսության ոլորտներում, առկա խնդիրները և առաջարկվող խելացի լուծումները, հնարավոր ֆինանսավորման մեխանիզմները, նիդերլանդական ներդրումների ներգրավման համար հայկական շուկայի գրավչությունը և այլ շատ հարցեր: Այնուհետև մասնակիցները B2B հանդիպումների ձևաչափով փոխանակվեցին կարծիքներով, հետաքրքիր բիզնես գաղափարներով և ապագա հնարավոր համագործակցության հեռանկարներով:
Ինչպես հայտնում են Նիդերլանդա-հայկական առևտրի պալատից, միջոցառումը կազմակերպվել էր Հայաստանում Նիդերլանդների Թագավորության դասպանատան նախաձեռնությամբ։
Գործարար համաժողովի ընթացքում Հայ-նիդերլանդական առևտրի պալատի նախագահ պրն. Լևոն Հայրապետյանն իր ելույթում ներկայացրեց պալատի հիմնական առաքելությունը և նպատակը. այն է՝ խթանել հայ-նիդերլանդական տնտեսական և կրթական կապերի զարգացմանն ու ամրապնդմանը՝ օգտագործելով մեր երկու երկրների միջև չօգտագործված ողջ ներուժը, հանդիսանալ այն կամուրջը, որը կմիավորի երկու ժողովուրդներին՝ բարեկամության և մշակույթների փոխադարձ ճանաչման ճանապարհով, դառնալ հարթակ՝ երկուստեք գործարար կապերի ստեղծման, շահերի զուգակցման և նոր ներդրումների ներգրավման համար: Պրն. Հայրապետյանը նաև ներկաներին համառոտ ծանոթացրեց պալատի կողմից տրամադրվող հիմնական ծառայություններին և համագործակցության առավելություններին:
