Տավուշի մարզպետ Հայկ Ղալումյանի հավաստմամբ՝ 2020 թվականի 44-օրյա պատերազմից հետո Տավուշի մարզի սահմաններում որևէ փոփոխություն, առաջխաղացում չի եղել։
Վերջինս այս մասին այսօր ասաց Ազգային Ժողովում լրագրողների հետ ճեպազրույցի ժամանակ:
Ղալումյանը, սակայն, չցանկացավ պատասխանել հարցին, թե հնարավո՞ր է՝ մարզում «ոչ հայկական գյուղերը» հանձնվեն ադրբեջանական կողմին: «Ես այդ հարցին չեմ պատասխանում»,- ասաց նա:
Լրագրողների դիտարկմանը՝ այդպիսի հարց չկա՞, դրա համար մարզպետը ոչինչ չի կարող պատասխանել, Ղալումյանը շեշտեց՝ իր անձնական որոշումն է: «Այդպիսի հարցերի չեմ պատասխանում։ Այդպիսի բան չի քննարկվում»,- նշեց մարզպետը՝ ժխտելով նաև այն հարցը, թե մարզի սահմաններից մեկում ռուսական անցակետ կա։
Ըստ նրա՝ Տավուշի մարզի 5000 հեկտար հայկական հողերը դեռ 90-ականներից գտնվում են Ադրբեջանի վերահսկողության տակ։