Պաշտոնական Երևանն ու Մոսկվան բանակցություններ են սկսել Հայաստանում ռուսական ռազմակայանի ընդլայանման շուրջ: Այդ նպատակով Ռուսաստանի մայրաքաղաք է մեկնել ներկայացուցչական պատվիրակություն, որի մասին համապատասխան որոշումը ՀՀ վարչապետի պաշտոնակատար Նիկոլ Փաշինյանը ստորագրել էր նախորդ շաբաթվա սկզբին:
Պատվիրակությունը բաղկացած է Հայաստանի պաշտպանության, արտաքին գործերի, տարածքային կառավարման և ենթակառուցվածքների նախարարությունների, ԶՈՒ Գլխավոր շտաբի, հայ-ռուսական միացյալ խմբավորման, ինչպես նաև Կադաստրի կոմիտեի բարձրաստիճան ներկայացուցիչներից։
Համապատասխան որոշման մեջ ասվում է.
«Հայաստանի տարածքում ռուսաստանյան ռազմակայանի տեղակայման և գործառնման նպատակով հողատարածքների և անշարժ գույքի փոխանցման հայ-ռուսական միջպետական հանձնաժողովի 13-րդ նիստին մասնակցելու նպատակով 2021 թվականի հունիսի 26-ից մինչև հուլիսի 1-ը Ռուսաստանի Դաշնություն (Մոսկվա) գործուղել պատվիրակություն։
14 հոգանոց պատվիրակությունը ղեկավարում է Պաշտպանության նախարարության կապիտալ շինարարության և զորքերի բնակավորման վարչության պետ, միջպետական հանձնաժողովի հայկական մասի նախագահ Արմեն Ավետիսյանը»։
Kommersant-ը գրում է, որ հանձնաժողովի նիստում կքննարկվեն ռազմաբազայի շահագործման ու գործունեության համար անհրաժեշտ հողամասեր ու անշարժ գույք ռուսական կողմին փոխանցելու հետ կապված հարցեր:
Մայիսին Նիկոլ Փաշինյանը կառավարության նիստերից մեկում հայտնեց, որ 102-րդ ռուսական ռազմաբազան երկու նոր հենակետ է զբաղեցրել Սյունիքի մարզում՝ սահմանակից Ադրբեջանին և Իրանին:
Մայիսի 27-ին ՀՀ կառավարության նիստում որոշում կայացվեց Սյունիքի մարզում շուրջ 3,5 հեկտար ընդհանուր մակերեսով հողամասեր անհատույց օգտագործման իրավունքով Ռուսաստանի Անվտանգության դաշնային ծառայության՝ ФСБ-ի Հայաստանում տեղակայված սահմանապահ վարչությանը հատկացնելու մասին: Ռուս սահմանապահների օգտագործմանն են անցնում Սյունիքի մարզի Շիկահող գյուղից, Մեղրիի Շվինաձոր, Կարճևան, Նռնաձոր գյուղերից ու Տեղ համայնքից 7 միավոր հողակտոր։
Հայ-ռուսական միջպետական հանձնաժողովի 13-րդ նիստը Մոսկվայում մեկնարկել է այսօր։